Նախագահ Սերժ Սարգսեան Խորհրդակցութիւն Ունեցած Է Հանրային Ծառայութիւնները Կարգաւորող Յանձնախումբի Անդամներուն Հետ

0
159

Նախագահ Սերժ Սարգսեան երէկ խորհրդակցութիւն ունեցած է Հանրային ծառայութիւնները կարգաւորող յանձնախումբի անդամներուն հետ:

Հանդիպումին սկիզբը հանրապետութեան նախագահը նշած է, որ այսպիսի կազմով յանձնախումբին հետ առաջին անգամ կազմակերպուող խորհրդակցութիւնը պայմանաւորուած է այն հանգամանքով, որ սահմանադրական փոփոխութիւններու լոյսին տակ Հանրային ծառայութիւնները կարգաւորող յանձնախումբը կը դառնայ ինքնավար մարմին, որուն վերաբերեալ նոր օրէնքը արդէն ընդունուած է, փոխուած են յանձնախումբին կարգավիճակն ու անոր անդամներուն ներկայացուող պահանջները: Նախագահը խորհրդակցութեան մասնակիցներէն հետաքրքրուած է, թէ այս ընթացքին ի՛նչ խնդիրներ յառաջացած են, փոփոխութիւնները ինչպէ՛ս անդրադարձած են յանձնախումբի ընթացիկ գործունէութեան վրայ, եւ ի՛նչ պէտք է ըլլայ, որպէսզի հանրութեան մատուցուող ծառայութիւններուն որակը ալ աւելի բարելաւուի:

Հանրային ծառայութիւնները կարգաւորող յանձնախումբի նախագահ Ռոպերթ Նազարեան ըստ մարզերու ներկայացուցած է վերջին տարիներուն յանձնախումբին կատարած աշխատանքները եւ անդրադարձած 2018-ի գործունէութեան հիմնական ուղղութիւններուն: Ռոպերթ Նազարեան, այլ մարզերու կողքին ներկայացուցած է նաեւ Արցախի Հանրապետութեան հետ փոխգործակցութեան եւ միջազգային համագործակցութեան ուղղութիւններով 2016-2017 տարիներուն յանձնախումբին կատարած աշխատանքները:

Խորհրդակցութեան աւարտին նախագահ Սերժ Սարգսեան անհրաժեշտ նկատած է յստակացնել կարգաւորուող ընկերութիւններու փոխյարաբերութիւններու իրաւական դաշտը, բարձրացնել սպառողներու շահերու պաշտպանութեան մակարդակը եւ անոնց անմիջական ներգրաւումը կարգաւորման հոլովոյթին:

Հանրապետութեան նախագահը կարեւոր նկատած է նաեւ յանձնախումբը իր հրապարակային եւ թափանցիկ գործունէութեան շնորհիւ հանրութեան լաւագոյնս ճանաչելի դարձնելը` ամրապնդելով վստահութիւնը կառոյցին նկատմամբ:

LEAVE A REPLY

Please enter your comment!
Please enter your name here