«Սէրը Աստուծոյ Ճառագայթն Է Մարդկային Կեանքին Մէջ` Մեր Կեանքն Ու Շրջապատը Լուսաւորող» Շաշտեց Արամ Ա. Կաթողիկոս

0
173

Հինգշաբթի, 29 մարտ 2018-ի երեկոյեան ժամը 4:00-ին, Անթիլիասի մայրավանքի Ս. Գրիգոր Լուսաւորիչ մայր տաճարին մէջ տեղի ունեցաւ Ոտնլուայի հոգեպարար արարողութիւն, որուն հանդիսապետեց Արամ Ա. կաթողիկոսը: Հետեւելով Յիսուս Քրիստոսի օրինակին, վեհափառ հայրապետը լուաց միաբան հայրերուն եւ դպրեվանքի սաներուն ոտքերը, ապա տուաւ իր հայրապետական պատգամը:

Իր պատգամին մէջ վեհափառ հայրապետը ընդգծեց Քրիստոսի սէրը եւ յայտնեց, որ Ոտնլուայի արարողութեամբ կը շեշտուի սիրոյ հրամայականը: Ան ըսաւ, թէ Քրիստոս ո՛չ միայն զանազան առիթներով խօսեցաւ սիրոյ անհրաժեշտութեան մասին, այլեւ իր աշակերտներուն ոտքերը լուալով ցոյց տուաւ մարդուն, թէ սէրը կեանքին մէջ պէտք է մշտական ներկայութիւն դառնայ: Սէրը մտածում չէ, այլ կեանքի որակ է: Աստուած մարդուն Ինքզինք ճանաչելի դարձուց սիրոյ ճամբով. այլապէս մենք չենք կրնար զԱստուած տեսնել մեր մտքին կամ գիտութեան ճամբով, Աստուած Ի՛նքն է, որ Ինքզինք տեսանելի կը դարձնէ ու դարձուց` Իր սէրը յայտնելով մարդուն նկատմամբ, ըսաւ վեհափառ հայրապետը:

Վեհափառ հայրապետը վերյիշեցուց, որ Աստուած Որդիին մարդեղացումով կամուրջ մը նետեց երկրին ու երկինքին միջեւ, որպէսզի մարդը սիրոյ երկխօսութեան ճամբով երկինք բարձրանայ: Մենք նեղ հասկացողութեամբ պէտք չէ հասկնանք Քրիստոսի պատուէրը, որ կ՛ըսէ` «սիրեցէք զիրար»: Քրիստոս ի՛նք սիրեց մեզ ու իր արիւնով մեզ Աստուծոյ որդեգիր զաւակները դարձուց, իսկ Աստուծոյ հետ մեր յարաբերութիւնը դարձաւ Հօր եւ զաւակի յարաբերութիւն: Այդ յարաբերութեան խորքը, իմաստն ու նպատակը սէրն է եւ այդ սէրը գիտակի՛ց սէր է, ըսաւ վեհափառ հայրապետը:

Նշենք, որ երեկոյեան ժամը 7:30-ին տեղի ունեցաւ Քրիստոսի մատնութիւնը, չարչարանքները եւ խաչելութիւնը խորհրդանշող «Խաւարման գիշեր»-ը:

 

LEAVE A REPLY

Please enter your comment!
Please enter your name here