Ամերիկեան Բանակը Կը Շարունակէ Թուրքիան Համարել ՆԱԹՕ-ի Իր Սերտ Դաշնակիցը

0
217

ՈՒԱՇԻՆԿԹԸՆ, «Էյ.Փի.».- Եւրոպա հաստատուած Միացեալ Նահանգներու զինուորական ուժերու հրամանատարութեան բանբեր Ճանի Մայքըլ յայտարարած է. «Թուրքիա կը շարունակէ Հիւսիսային Ատլանտեան դաշինքին՝ ՆԱԹՕի մէջ, մեր սերտ դաշնակիցը մնալ, եւ Ինճիրլիքի մէջ անոր օդուժի ռազմակայանը կը շարունակէ դաշինքին համար կարեւոր դեր ունենալ»:

Մայքըլ նաեւ շեշտած է, թէ «Իսլամական պետութեան» դէմ պայքարին մէջ, դաշինքին համար Ինճիրլիք ռազմակայանը կը շարունակէ ըլլալ կարեւոր դիրք՝ հերքելով այդ ռազմակայանին վերաբերեալ վերջերս շրջող լուրերը, թէ՝ հոն գոծողութիւնները զգալիօրէն նուազած են՝ Թուրքիոյ եւ Միացեալ Նահանգներու միջեւ տարակարծութիւններուն իբրեւ հետեւանք։

«Այդ լուրերուն նպատակը Անգարայի եւ Ուաշինկթընի միջեւ անվստահութիւնը աճեցնելն է եւ՝ սեպ խրել այնպիսի՛ պահու մը, երբ պէտք է մեր հասարակաց շահերը հետապնդենք», նշած է բանբերը:

Յիշեցնենք, որ թրքական «Հիւրրիյէթ» եւ ամեիկեան «Ուոլ Սթրիթ Ճըրնըլ» թերթերը հաղորդած էին, թէ Միացեալ Նահանգները Ինճիրլիք ռազմակայանէն դուրս բերած է զինամթերքի պահեստ մը՝ աւելցնելով, որ այդ մէկը ռազմակայանէն դուրս բերուած ամերիկեան արդէն իսկ երրորդ շարժական զինապահեստն է:

Նախապէս հաղորդուած էր, որ Միացեալ Նահանգներ, անցեալ Յունուարին, Թուրքիայէն Աֆղանիստան տեղափոխած է ռազմական օդանաւերու ամբողջ ստորաբաժին մը:

Միւս կողմէ, ամերիկեան բանակի կեդրոնական հրամանատարութեան ղեկավար զօր. Ճոզէֆ Վոթըլ, Ամերիկայի ու Անգարայի միջեւ՝ Սուրիոյ իրավիճակին շուրջ եւ մասնաւորաբար Մընպեճ քաղաքին վերաբերեալ առկայ տարակարծութիւններուն մասին հարցումի մը պատասխանելով՝ յայտնած է, որ կողմերուն միջեւ գոյութիւն ունեցող հաղորդակցութիւնը «լա՛ւ ու բա՛ց է»:

«Մենք Թուրքիոյ հետ այդ առնչութեամբ աշխոյժ երկխօսութեան մէջ ենք», վստահեցուցած է Վոթըլ, սակայն՝ առանց մանրամասնելու:

LEAVE A REPLY

Please enter your comment!
Please enter your name here