Ռուսիա Բրիտանիայէն Կը Պահանջէ Ներում Հայցել, Իսկ Գերմանիա՝ Փաստեր

0
182

ՄՈՍԿՈՒԱ, ՊԵՐԼԻՆ, «Ռոյթըրզ».- Քրեմլինը կը պահանջէ, որ Բրիտանիա ներում հայցէ ռուս նախկին լրտես Սերկէյ Սքրիփալի եւ անոր դստեր թունաւորման յաջորդած իրադարձութիւններուն համար:

Բրիտանիոյ ուղղուած ներում հայցելու պահանջը կը յաջորդէ Բրիտանիոյ պաշտպանութեան նախարարութեան տարրալուծարանի բարձրաստիճան պաշտօնատար Կերի Էյթքընհետի՝ Ապրիլ 3ի յայտարարութեան, թէ՝ «գիտնականները յստակ կերպով չեն կրցած բացայայտել, որ ջիղեր անդամալուծող թունաւոր նիւթին աղբիւրը Ռուսիան է»:

Նախապէս կը պնդուէր, որ թունաւոր նիւթը հաւանաբար արտադրուած է Ռուսիա:

66 տարեկան Սերկէյ Սքրիփալ եւ անոր դուստրը՝ 33 տարեկան Եուլիա, 4 Մարտին անգիտակից վիճակի մէջ յայտնաբերուած էին բրիտանական Սալզպըրի քաղաքին մէջ եւ տեղափոխուած էին հիւանդանոց:

Բրիտանիա, Միացեալ Նահանգներ եւ երկու տասնեակ այլ երկիրներ, այս դէպքին պատճառով, աւելի քան 150 ռուս դիւանագէտներ արտաքսեցին. քայլ մը, որուն հակադարձեց Ռուսիա:

3 Ապրիլի բացայայտումին հակադարձելով՝ Գերմանիոյ կառավարութեան Ռուսիոյ հարցերով պատասխանատու պաշտօնատար Կերոնթ Էրլեր,  5 Ապրիլին յայտարարեց, թէ Բրիտանիա պէտք է յստակ փաստեր ներկայացնէ թունաւորման մէջ Ռուսիոյ դերակատարութեան մասին, որովհետեւ տարրալուծարանին եզրակացութիւնը խոտոր կը համեմատի՝ «մեր նախապէս լսած տեղեկութիւններուն հետ»։

LEAVE A REPLY

Please enter your comment!
Please enter your name here