Ալիեւ Կը Խօսի Իր Բանակի Նոր Սպառազինութեան Մասին

0
487

ԵՐԵՒԱՆ, «Ազատութիւն».- «Հայաստան չի փափաքիր փոխել Լեռնային Ղարաբաղի ներկայ իրավիճակը», ռուսական «Թասս» լրատու գործակալութեան հետ հարցազրոյցի մը ընթացքին պնդած է Ատրպէյճանի նախագահ Իլհամ Ալիեւ՝ աւելցնելով, որ Երեւանի այս դիրքորոշումը այն գլխաւոր խոչընդոտն է, որ դէմ կը դնէ Արցախի հակամարտութեան լուծման:

Լրատու գործակալութեան փոխ-տնօրէն եւ ծագումով պաքուեցի Միխայիլ Կուսմանի հետ զրոյցին ընթացքին, Ալիեւ նաեւ նշած է. «Յայտարարութիւններու մակարդակով, Հայաստան կը պնդէ, թէ կը փափաքի բանակցութիւններ վարել: Սակայն, իրականութեան մէջ, անիկա զբաղած է զանոնք կեղծելով: Հայաստան ամէն ինչ կ՛ընէ, որպէսզի փակ շրջանակ ստեղծուի եւ այս ամէնը վերածուի անվերջ գործընթացի մը: Այս մէկը ո՛չ մեզի համար ընդունելի է, ո՛չ ալ միջազգային հանրութեան համար»:

Ալիեւ ապա շեշտած է, թէ Պաքուի համար ընդունելի տարբերակը ՄԱԿ-ի Ապահովութեան խորհուրդի չորս բանաձեւերուն կատարումն է, այսինքն՝ «հայկական ուժերու անյապաղ հեռացումը գրաւեալ տարածքներէն»:

«Ատրպէյճանական հողերու ազատագրումը առաջին քայլն է հակամարտութեան փուլային կարգաւորման ճամբուն վրայ: Այդ կարգաւորումը պէտք է իրականացուի միջազգային իրաւունքի սկզբունքներու հիման վրայ», յայտնած է Ալիեւ՝ կոչ ընելով ԵԱՀԿ Մինսկի խմբակի համանախագահ պետութիւններուն, որ աւելի աշխոյժ դիրքորոշում որդեգրեն Արցախի հակամարտութեան նկատմամբ:

«Միջնորդական առաքելութեան լիազօրութիւն ունեցող Մինսկի խմբակը համանախագահող երկիրներու՝ Ռուսիոյ, Ֆրանսայի եւ Միացեալ Նահանգներու պետութիւններու ղեկավարներուն մակարդակով, բազմիցս յայտարարուած է, որ ներկայ իրավիճակը անընդունելի է եւ պէտք է փոխուի: Մենք միանշանակօրէն համաձայն ենք այդ մօտեցումին եւ կը կարծենք, որ այդ յայտարարութիւնները շատ տեղին են: Միւս կողմէ, պէտք է գիտակցիլ, որ յայտարարութիւններէն աւելի շատ կարեւոր է հակամարտութեան կարգաւորումը», ըսած է Իլհամ Ալիեւ:

Խօսելով ատրպէյճանական բանակի վերազինման գործընթացին մասին՝ Ալիեւ յայտնած է, թէ այդ գործընթացը գրեթէ աւարտին մօտեցած է: «Միջազգային փորձագէտներու եւ կազմակերպութիւններու գնահատումով՝ Ատրպէյճանի զինուած ուժերը այսօր աշխարհի 50 ամենամարտունակ ու լաւ սպառազինուած բանակներէն են: Մենք գործնականին մէջ աւարտած ենք մեր բանակի վերազինման գործընթացը: Այսօր մեր բանակը յագեցած է թէ՛ յարձակողական եւ թէ պաշտպանողական բնոյթի ամենաժամանակակից արհեստագիտութեամբ եւ ճշգրտութեան բարձր աստիճան ունեցող սպառազինութեամբ: Մենք սպառազինութիւն ձեռք կը բերենք աշխարհի լաւագոյն արտադրողներէն: Ձեռք բերուած այս սպառազինութիւնը մեզի ինքնավստահութիւն կու տայ», յայտարարած է Ատրպէյճանի ղեկավարը՝ աւելցնելով. «Յառաջիկային սպառազինութեան գնումը աւելի ընտրովի եւ յստակ բնոյթ պիտի ունենայ, միտուած այս կամ այն խնդիրի լուծման»:

Իսկ խօսելով ռուս-ատրպէյճական կապերուն ներկայ վիճակին մասին՝ Ալիեւ պնդած է, որ զանոնք ռազմավարական գործընկերութեան մակարդակի հասցնելը կարելի եղած է նախեւառաջ՝ նախագահ Վլատիմիր Փութինի հետ իր ունեցած անձնական լաւ յարաբերութիւններուն շնորհիւ:

 

LEAVE A REPLY

Please enter your comment!
Please enter your name here