Հրաժարած Վարչապետը Կ՛առաջարկէ Սերժ Սարգսեանը Պահել Իբրեւ Երկրի Առաջին Դէմք

0
193

ԵՐԵՒԱՆ, «Արմէնփրէս».- Հայաստանի վարչապետի պաշտօնակատար Կարէն Կարապետեան 9 Ապրիլին անդրադարձաւ նախագահ Սերժ Սարգսեանի հետ անցեալ Շաբաթ օր իր ունեցած հանդիպման: Ան պատասխանեց նաեւ ապագայ վարչապետի թեկնածութեան մասին հարցումի մը եւ ներկայացուց իր տեսակէտը:

«Նախագահ Սերժ Սարգսեանին զեկուցել եմ մեր թիմի կատարած աշխատանքի մասին, քննարկել ենք՝ որտեղ ենք գտնւում, մեր պատկերացմամբ ինչ ապագայ ունենք եւ ինչպէս պէտք է դրան հասնել: Համոզուած եմ, որ մենք իրականում ունենք շատ լաւ հնարաւորութիւններ մօտակայ տարիներին յաջողութիւններ արձանագրելու համար: Մեր կանխատեսումներով՝ մենք ունենալու ենք տնտեսական աճ, եւ քաղաքական երկխօսութեան պարագայում կարող ենք ֆունդամենտալ (հիմնական-Խմբ.), երկար հորիզոնով բարեփոխումներ անել եւ նաեւ յստակ պատկերացնում ենք, թէ դրանք ինչպէս պէտք է անենք:

Այո՛, անդրադարձել ենք նաեւ վարչապետի թեկնածուի վերաբերեալ հարցին, խօսել ենք սահմանադրութեան, կառավարման նոր համակարգի մասին: Համակարծիք էինք, որ երկրի առջեւ կանգնած մարտահրաւէրների եւ խնդիրների պարագայում կառավարման նոր համակարգին սահուն անցումը ապահովելը եւ վերջնական ձեւաւորումը չափազանց կարեւոր խնդիր է: Ինչպէս նաեւ հաշուի առնելով վերջին ժամանակահատուածում ներկայիս կառավարման կոնֆիգուրացիայով (դասաւորումով-Խմբ.) արձանագրուած յաջողութիւնները՝ որոշել ենք մեր կուսակցական գործընկերներին առաջարկել այս ժամանակահատուածում ներկայիս կառավարման կոնֆիգուրացիան պահպանել, այսինքն, որպէս առաջին դէմք ներկայացնել Սերժ Սարգսեանի թեկնածութիւնը:

«Որովհետեւ, կրկնում եմ, չափազանց կարեւոր է սահուն, արդիւնաւէտ եւ ռիսկերը (վտանգները-Խմբ.) նուազեցնելով անցում կատարել կառավարման նոր համակարգին», ըսաւ Կարէն Կարապետեան:

LEAVE A REPLY

Please enter your comment!
Please enter your name here