Արմէն Սարգսեան. «Իբրեւ Հայաստանի Հանրապետութեան Նախագահ` Իմ Խնդիրս Կը Նկատեմ Հայ-Ռուսական Ռազմավարական Յարաբերութիւններու Հետագայ Ամրապնդումը»

0
212

Երէկ Հայաստանի նախագահի պաշտօնին վրայ Արմէն Սարգսեան իր առաջին հարցազրոյցը տուած է: Ռուսական ԹԱՍՍ լրատու գործակալութեան հետ զրոյցի մը ընթացքին ան անդրադարձած է հայ-ռուսական յարաբերութիւններուն, ղարաբաղեան տագնապին, տնտեսական հարցերուն:

«Հայաստանի եւ Ռուսիոյ միջեւ յարաբերութիւնները իրապէս յատուկ են դաշնակցային, ռազմավարական բնոյթով, կը ներառեն ամէնէն բարձր մակարդակով աշխուժ քաղաքական երկխօսութիւն, արդիւնաւէտ համագործակցութիւն տնտեսական, զինուորական, ռազմական-արհեստագիտական եւ մարդասիրական մարզերուն մէջ: Կ՛ամրապնդուի մեր փոխադարձ գործակցութեան խորհրդարանական չափով:

«Կ՛ուզեմ նաեւ ընդգծել Հայաստանի եւ Ռուսիոյ փոխադարձ գործակցութիւնը Հաւաքական անվտանգութեան պայմանագիրի կազմակերպութեան, Եւրասիական տնտեսական միութեան, ԵԱՀԿ-ի, ՄԱԿ-ի շրջանակներու, ինչպէս նաեւ այլ բազմակողմանի հարթակներու մէջ, ինչ որ էապէս կը հարստացնէ հայ-ռուսական համագործակցութեան ամբողջ համալիրը», ըստ նախագահի կայքին, ԹԱՍՍ-ի հետ զրոյցի ընթացքին ըսած է Արմէն Սարգսեանը` շարունակելով. «Վերջին տարիներուն Հայաստանի ու Ռուսիոյ ղեկավարութեան` Սերժ Սարգսեանի եւ Վլատիմիր Փութինի միացեալ ջանքերուն շնորհիւ մեր բարեկամութիւնն ու համագործակցութիւնը աստիճանաբար զարգացած են, նոր որակ եւ աշխուժութիւն ձեռք բերուած են, համալրուած են նոր ուղենիշներով եւ շեշտադրումներով: Յատկանշական է, որ դիւանագիտական յարաբերութիւններու 25-ամեայ պատմութեան ընթացքին առաջին անգամ երկիրներու ղեկավարներու մակարդակով պետական փոխադարձ այցելութիւններ տեղի ունեցած են վերջին տասնամեակի ընթացքին: Միաժամանակ, իրականացուած աշխատանքներու եւ ձեռքբերումներու հետ միասին մենք հետագայ աշխատանքի հսկայական ներուժ ու լայն դաշտ ունինք»:

«Ե՞րբ կը նախատեսէք ձեր առաջին այցելութիւնը Ռուսիա», այս հարցումին պատասխանելով` նախագահ Սարգսեան նշած է. «Բնականաբար, շատ հետաքրքրուած եմ, որ ամէնէն մօտ ժամանակին Հայաստանի նախագահի կարգավիճակով այցելեմ Մոսկուա: Աւանդաբար, Հայաստանի ղեկավարները առաջին պաշտօնական այցելութիւնները կը կատարեն Մոսկուա: Առայժմ յստակ ժամկէտ չկայ»:

Անդրադառնալով ղարաբաղեան տագնապին` նախագահ Արմէն Սարգսեան ռուսական գործակալութեան հետ զրոյցին ընթացքին ըսած է. «Ի վերջոյ շրջանային բոլոր տագնապները պիտի լուծուին, անոնք յաղթահարելի են: Պատմութիւնը աւելի դաժան տագնապներ տեսած է: Արդէն 25 տարիէ աւելի տագնապի խաղաղ լուծման բանակցութիւնները կ՛ընթանան ԵԱՀԿ-ի Մինսքի խմբակի ձեւաչափով` համանախագահ երկիրներ Ռուսիոյ, Միացեալ Նահանգներու եւ Ֆրանսայի առաջարկած լուծման սկզբունքներու եւ տարրերու հիման վրայ: Ռուսիան, իբրեւ Մինսքի խմբակի համանախագահ, առանցքային դեր ունի ղարաբաղեան տագնապի լուծման գործին մէջ:

«Յիշեցնեմ, որ 23 տարի առաջ Ղարաբաղի մէջ եռակողմ զինադադարը հաստատուեցաւ Ռուսիոյ միջնորդութեան շնորհիւ: Մենք բարձր կը գնահատենք տագնապի խաղաղ քաղաքական լուծման ուղղութեամբ այդ միջնորդական ջանքերը: Ակնյայտ է, որ տագնապին լուծման համար անհրաժեշտ է խաղաղութեան ու համաձայնութեան հասնելու կամք: Խաղաղութեան հասնելու համար Հայաստանը իր կողմէ կը կատարէ ամէն կարելին եւ կ՛ակնկալէ, որ ազրպէյճանական կողմը նոյն վերաբերմունքը ցուցաբերէ»:

Հարցազրոյցին ընթացքին խօսուած է նաեւ Հայաստանի` կառավարման խորհրդարանական համակարգին անցնելուն հարցը: «Քաղաքական նոր համակարգի պայմաններուն մէջ պետական իշխանութիւնը լիովին բաժնուած է խորհրդարանի, կառավարութեան ու նախագահի հաստատութիւններուն միջեւ: Վստահ եմ, որ միացեալ ջանքերով մենք պիտի կարենանք լուծել այն սուր խնդիրները, որոնք ծառացած են մեր հասարակութեան առջեւ, որովհետեւ միայն համախմբուած, համերաշխ հասարակութիւնը կրնայ արդիւնաւէտօրէն արձագանգել ժամանակի մարտահրաւէրներուն», նշած է նախագահ Սարգսեան:

Խօսելով Հայաստանի մէջ արտասահմանեան ներդրումներ բերելու անհրաժեշտութեան մասին` նախագահ Արմէն Սարգսեան նշած է. «Անհրաժեշտ է այնպէս մը ընել, որ իւրաքանչիւր կարողական ներդրող գիտնայ, թէ ի՛նչ կը սպասէ իրեն, այսինքն` ի՛նչ պայմաններով պիտի աշխատի, ինչպիսի՛ն է երկրի օրէնսդրութիւնը, ուր ան ներդրում պիտի կատարէ: Իսկ բարենպաստ ներդրումային միջավայր ապահովելու համար պէտք է ջանասիրութեամբ աշխատիլ: Պէտք է մտածել երկրի տնտեսական եւ ներդրումային գրաւչութեան, օրէնքի գերակայութեան հետագայ ամրապնդման եւ օրէնքին առջեւ բոլորին հաւասարութեան մասին», ըսած է նախագահ Արմէն Սարգսեան:

«Ի՞նչ նշանակութիւն ունի Ռուսիան ձեզի համար», այս հարցումին նախագահ Սարգսեանը հետեւեալ պատասխանը տուած է. «Ինծի համար Ռուսիան նախ եւ առաջ եղբայրական երկիր է, որուն հետ մեզ կը կապեն մեր ժողովուրդներու բարեկամութեան ամուր կապերը»: «Իբրեւ Հայաստանի նախագահ` ես, անկասկած, իմ խնդիրս կը նկատեմ հայ-ռուսական ռազմավարական յարաբերութիւններու հետագայ ամրապնդումը, մեր ժողովուրդներու բարեկամութեան ամրապնդումը, մարդկային յարաբերութիւններու զարգացումը», նշած է նախագահ Արմէն Սարգսեան:

LEAVE A REPLY

Please enter your comment!
Please enter your name here