Կարօ Փայլանի Եւ Քրտամէտ Կուսակցութեան Այլ Երեսփոխաններու Անձեռնմխելիութիւնը Խլելու Դիմում

0
176

ԵՐԵՒԱՆ, «Արմէնփրէս».- Թրքական «Անատոլու» լրատու գործակալութիւնը կը հաղորդէ, թէ Անգարայի հանրապետական դատախազութիւնը, քրտամէտ Ժողովուրդներու ժողովրդավարական կուսակցութեան 8 պատգամաւորներու նկատմամբ իրաւական գործընթաց սկսելու նպատակով պահանջագիր մը պատրաստած է: Պատգամաւորներուն շարքին է նաեւ Կարօ Փայլան:

Փայլանի կողքին, պահանջագիրին մէջ ներառուած են պատգամաւորներ Օսման Պայտեմիրի, Ալիճան Օնլուի, Ֆելեքնաս Ուճայի, Սիպել Եղիթալփի, Նատիր Եըլտըրըմի, Տիլեք Օճալանի եւ Միզկին Ըրկաթի անունները: Անոնք կը մեղադրուին՝ «թուրք ազգը, Թուրքիոյ հանրապետութիւնը, կառավարութիւնը, պետութեան զինուորը կամ ապահովական համակարգը հրապարակայնօրէն ծաղրելու», «ահաբեկչական խմբաւորման ի նպաստ քարոզչութիւն ընելու», «քաղաքական կուսակցութիւններու կանոններուն հակառակ գործելու» եւ «հանրապետութեան նախագահը վիրաւորելու» յանցանքներով:

Կարօ Փայլանի դէմ պատրաստուած պահանջագիրին մէջ մասնաւորապէս կը նշուի, որ ան  1 Մայիս 2017ին, Գանատայի մէջ տուած հարցազրոյցին ընթացքին, իր արտայայտած միտքերով «հրապարակայնօրէն ծաղրած է թուրք ազգը, Թուրքիոյ Հանրապետութիւնը եւ կառավարութիւնը», ինչպէս նաեւ «վիրաւորած հանրապետութեան նախագահը»:

Պահանջագիրներով կը նախատեսուի պատգամաւորները զրկել անձեռնմխելիութենէ: Պահանջագիրները ուղարկուած են Թուրքիոյ արդարադատութեան նախարարութիւն՝ խորհրդարանի նախագահութեան ներկայացուելու նպատակով:

Թուրքիոյ խորհրդարանի նախագահութիւն ներկայացուելէ ետք՝ հարցը քննարկման կը դրուի յատուկ յանձնաժողովի մը կողմէ, որուն կազմին մէջ են խորհրդարանի Սահմանադրական եւ Արդարադատութեան հարցերով յանձնախումբներու անդամներ:

Նշեալ յանձնաժողովը հարցը ուսումնասիրելէ ետք կը պատրաստէ համապատասխան զեկոյց մը, որ վերջնական քուէարկութեան կը դրուի խորհրդարանին առջեւ:

Անձեռնմխելիութենէ զրկուելու պարագային, պատգամաւորները կրնան հարցը բողոքարկել Սահմանադրական դատարանին մէջ:

LEAVE A REPLY

Please enter your comment!
Please enter your name here