Փաշինեան Պետական Շէնքերը Պաշարելու Կոչ Կ՛ընէ

0
211

ԵՐԵՒԱՆ.- Նիկոլ Փաշինեան Չորեքշաբթի, 18 Փետրուարին, Հանրապետութիւն հրապարակին վրայ հաւաքուած բազմութեան կոչ ուղղեց՝ յաջորդ օրը՝ Հինգշաբթի, առաւօտեան ժամը 8ին վերադառնալու հրապարակ եւ պաշարելու կառավարութեան շէնքը, թոյլ չտալու համար, որ վարչապետ Սերժ Սարգսեան մտնէ շէնք՝ իր աշխատանքներուն սկսելու:

Փաշինեան ընդհանուր գործադուլի եւ դասադուլի կոչեր ալ ուղղեց ցուցարարներուն: Պետական բոլոր շէնքերուն մուտքերը փակելու եւ պաշտօնեաներուն ցոյցերուն միանալ համոզելու առաջադրանք տուաւ ցուցարարներուն: Ան նաեւ դիմեց դպրոցական աշակերտներուն՝ Սերժ Սարգսեանի նկարները դպրոցական դասարաններու պատերէն հանելու:

Անդրադառնալով սփիւռքեան զօրակցութեան՝ Փաշինեան կրկնեց նախորդ օրուան յայտարարութիւնը, որ բաւական լուրջ գումարներ կը ստանայ սփիւռքահայ զօրակցողներու կողմէ եւ այդ նուիրատուութեանց միջոցաւ կը կատարուին ցոյցերուն համար անհրաժեշտ ծախսերը:

Փաշինեան նաեւ կարդաց Սերժ Թանգեանի՝ դիմատետրին մէջ արձանագրած ուղերձը ցոյցի մասնակիցներուն։ «Հայաստանի մէջ վերջապէս անհաւանական բան մը կը կատարուի: Քաղաքացիական անհնազանդութիւնը կ՛աճի եւ կը ստանայ գործադուլներու եւ դասադուլներու տեսք՝ ընդդէմ ոչ-արդարացի, կաշառակեր իշխող վերնախաւին: Այս շաբաթը նոր Հայաստանի առաջին շաբաթն է՝ ինչ ալ ըլլայ, անտարբերութիւնը ցրուած է: Սերժ Սարգսեան ինք խոստովանեցաւ, որ կրնայ ըլլալ, որ բնակչութեան 60 տոկոսը զինք չի սիրեր եւ համաձայն չէ իր հետ: Այնուամենայնիւ, ան յամառ է իր հովանաւորչական վերաբերմունքին եւ կառավարման հարցին մէջ: Սե՛րժ, չեմ փափաքիր անքաղաքավար երեւիլ, բայց դուն մեր հայրը չես, եւ մենք քու զաւակները չենք: Դուն ծառայած ես հայ ժողովուրդին եւ այլեւս  կենսունակ, յարգուած առաջնորդ չես, կանգ կ՛առնե՞ս արդեօք, թէ կը շարունակես անարդիւնաւէտ եւ այս պահուն վտանգաւոր կառավարումը», գրած է Թանգեան:

Փաշինեան դիմեց նաեւ Հայաստանի գիւղերու բնակիչներուն, որպէսզի պահանջեն իրենց գիւղապետներէն՝ միանալու ցոյցերուն:

LEAVE A REPLY

Please enter your comment!
Please enter your name here