Յայտարարութիւն

0
158

Հայութեան անժամանցելի իրաւունքներուն հաւատարմօրէն պահանջատէր լիբանանահայութիւնը, 23 ապրիլին Պուրճ Համուտէն դէպի Անթիլիաս կազմակերպուած երթով, Հայոց ցեղասպանութեան նուիրուած մատրան դիմաց նոյն օրը տեղի ունենալիք ոգեկոչման ձեռնարկով, եւ 24 ապրիլի առաւօտեան, դարձեա՛լ Անթիլիասի մայրավանքին մէջ կայանալիք պատարագով ու յատուկ արարողութեամբ պիտի նշէ Հայոց ցեղասպանութեան 103-ամեակն ու պիտի վերանորոգէ պայքարի իր ուխտը: Կեդրոնական այս ձեռնարկներուն զուգահեռ երիտասարդական, ուսանողական եւ յարանուանական տարբեր միաւորներ իրենց կարգին` համալսարաններու եւ տարբեր շրջաններու մէջ պիտի նշեն Հայոց ցեղասպանութիւնը եւ արծարծեն Հայ դատի այժմէական պատգամներն ու կատարեն ներկայի շեշտադրումները:

Թշնամի Թուրքիոյ` յատկապէ՛ս Միջին Արեւելքի մէջ խաղացած տխուր դերակատարութիւնը, ամէն օր ժողովրդավարութենէն քիչ մը աւելի հեռանալով, կոպիտ կերպով դրսեւորած մենատիրական ու ծաւալապաշտական քաղաքականութիւնը, եւ վերջապէ՛ս` Հայաստանի հանդէպ ցուցաբերած իր տակաւ աճող թշնամանքն ու ատելութիւնը, հայ քաղաքական միտքը կը դնեն զգօնութեան ու հեռատեսութեան հրամայականին դիմաց:

Այդ զգօնութեան արդիւնք էր անշուշտ այս տարեշրջանին հայութեան կողմէ Հայաստան-Թուրքիա փրոթոքոլներու վերջնական ջնջումը, ինչպէս նաեւ Թուրքիոյ կողմէ հովանաւորուած ազրպէյճանական յարձակողապաշտ ռազմավարութեան դիմաց հայկական դիւանագիտական ու ռազմական պատնէշի հզօրացումը:

Համահայկական մեր առաջադրանքներու ու տեսլականներու իրականացման գործընթացին մէջ, կասկածէ վեր է, որ Հայաստանը դարձած է կիզակէտն ու մեկնակէտը եւ անոր կայուն զարգացումն ու հզօրացումը եւ ներքին քաղաքական մշակոյթի առողջ ձեւաւորումը նախապայման են Հայ դատի պահանջատիրական երթի շարունակականութեան եւ ուժեղացման համար: Հետեւաբար, հայկական միասնական գործօնի անշեղ պահպանումը եւ մեր համայն ազգի միջնաբերդը` հայրենիքը ամուր պահելու առաջադրանքը իւրաքանչիւր հայ անհատի ճիտին պարտքն ու ազգային պարտաւորութիւնն է:

Հայոց ցեղասպանութեան 103-ամեակին առիթով կու գանք անգամ մը եւս հաստատելու, որ Հայաստան, Արցախ եւ սփիւռք եռամիասնութեան վրայ խարսխուած մեր պայքարը աննահա՛նջ է ու մեր իրաւունքները անժամանցելի՛ են, որքա՛ն ալ դժուար ըլլան միջազգային յարափոփոխ պայմաններն ու արգելքները եւ որքա՛ն ալ թշնամիի ռազմատենչ յայտարարութիւնները փորձեն խանգարել հայաշխարհը:

Կը խոնարհինք մեր մէկուկէս միլիոն սրբադասուած նահատակներու յիշատակին դիմաց եւ համահայկական ամուր յանձնառութեամբ ու հնչեղութեամբ կը վերանորոգենք պայքարի մեր կամքն ու վճռակամութիւնը:

ՍԴՀԿ ԼԻԲԱՆԱՆԻ ՇՐՋԱՆԻ ՎԱՐԻՉ ՄԱՐՄԻՆ
ՌԱԿ ԼԻԲԱՆԱՆԻ ՇՐՋԱՆԱՅԻՆ ՎԱՐՉՈՒԹԻՒՆ
ՀՅԴ ԼԻԲԱՆԱՆԻ ԿԵԴՐՈՆԱԿԱՆ ԿՈՄԻՏԷ

LEAVE A REPLY

Please enter your comment!
Please enter your name here