Պատգամաւոր Մանուէլ Գրիգորեանը Եւ Արթուր Ասատրեանը Ձերբակալուած Են

0
166

Հայաստանի Հանրապետութեան Ազգային անվտանգութեան ծառայութեան (ԱԱԾ) աշխատակիցները, յանցաւորութեան դէմ պայքարին ուղղուած իրենց գործառոյթներու իրականացման շրջագիծին մէջ, 16 յունիս 2018-ին Էջմիածին քաղաքին մէջ, երկու տարբեր քրէական գործերով, միաժամանակ իրականացուցած են խուզարկութիւններ, որոնց ծիրին մէջ յայտնաբերուած է ապօրինի պահուող մեծ քանակութեամբ զէնք եւ ռազմամթերք:

ԱԱԾ-ի քննչական վարչութեան մէջ քննուող` «Տոն Պիպօ» կեղծանունով ծանօթ Արթուր Ասատրեանին պատկանող առանձնատան, կից շինութիւններուն, այլ տարածքներու մէջ կատարուող խուզարկութիւններէ ետք յայտնաբերուած է ապօրինի պահուող զէնք եւ ռազմամթերք: Արթուր Ասատրեանը բերման ենթարկուած եւ ձերբակալուած է: Նոյն քրէական գործով ձերբակալուած են նաեւ 4 անձեր, որոնք Ռուսիոյ քաղաքացիներ են:

Նոյն Ազգային անվտանգութեան ծառայութեան կողմէ իրականացուած հետախուզական միջոցառումներուն հիմամբ տուեալներ ստացուած են, որ Հայաստանի Ազգային ժողովի պատգամաւոր, Երկրապահ կամաւորականներու միութեան (ԵԿՄ) նախագահ Մանուէլ Գրիգորեանը այլ անձերու հետ նախնական համաձայնութեամբ ապօրինի կերպով ձեռք բերած եւ պահած է զէնք եւ ռազմամթերք:

Դէպքին առիթով ԱԱԾ քննչական վարչութիւնը յարուցած է քրէական գործ եւ խուզարկութիւններ իրականացուցած Մանուէլ Գրիգորեանի տան, ամարանոցին եւ անոր պատկանող այլ տարածքներու մէջ: Յայտնաբերուած է ապօրինի կերպով պահուող մեծ քանակով զէնք եւ ռազմամթերք:

Ազգային ժողովի պատգամաւոր Մանուէլ Գրիգորեանը բերման ենթարկուած եւ ձերբակալուած է` նախատեսուած յանցագործութիւն կատարելու կասկածանքով: Հայաստանի Հանրապետութեան սահմանադրութեան 96-րդ յօդուածով սահմանուած կարգով, Ազգային ժողովի պատգամաւորը ազատութենէ զրկելու մասին տեղեկացուած է Ազգային ժողովի նախագահը:

ԱԱԾ-ն յայտարարութեամբ մը տեղեկացուցած է, թէ քրէական գործերու նախաքննութեան ընթացքին եւ արդիւնքներուն մասին յառաջիկային պիտի տրամադրէ մանրամասն տեղեկատուութիւն:

Ազգային ժողովի Հայաստանի Հանրապետական կուսակցութեան (ՀՀԿ) խմբակցութեան պատգամաւոր Մանուէլ Գրիգորեանի ձերբակալման առիթով ՀՀԿ-ն հրապարակած է յայտարարութիւն մը, որուն մէջ նշած է, թէ «Արցախի հերոս Մանուէլ Գրիգորեանի ձերբակալութիւնը պետական ճնշող քաղաքականութեան գործադրման հերթական ահազանգն է: Մենք (ՀՀԿ-ն, «Ա.») մեր ուշադրութեան կեդրոնը պիտի պահենք այս հարցի լիարժէք եւ անաչառ քննութիւնը եւ պիտի պայքարինք Մանուէլ Գրիգորեանի իրաւունքներու ամբողջական պաշտպանութեան համար»:

Նոյն ծիրին մէջ, ՀՅԴ Էջմիածինի «Վաչէ Ռոստոմեան» կոմիտէն տարածած է հաղորդագրութիւն մը, որուն մէջ նշուած է. «Հաշուի առնելով Էջմիածին քաղաքին մէջ ստեղծուած պայթիւնավտանգ իրավիճակը` կողմերուն կոչ կ՛ուղղենք պահպանելու հանդարտութիւնը, իսկ ժողովուրդին` համերաշխութիւնը եւ համբերութիւնը:

Կոմիտէն ստեղծուած իրավիճակը հաշուի առնելով` գործող քաղաքապետ Կարէն Գրիգորեանին կոչ կ՛ուղղէ ներկայացնելու հրաժարականի դիմում:

ՀՅԴ Էջմիածինի «Վաչէ Ռոստոմեան» կոմիտէն միշտ կանգնած է ժողովուրդի կողքին»:

Երէկ երեկոյեան Էջմիածինի քաղաքապետ Կարէն Գրիգորեանը ֆէյսպուքեան իր էջին վրայ գրած է, թէ հրաժարած է Էջմիածինի քաղաքապետի պաշտօնէն:

LEAVE A REPLY

Please enter your comment!
Please enter your name here