Զինուորներու Ուղարկուած Օգնութիւնը Գողնալու Մեղադրանքով Ձերբակալուած Մանուէլ Գրիգորեանի Անձեռնմխելիութեան Հարցը Պիտի Քննէ Ազգային Ժողովը

0
163

ԵՐԵՒԱՆ.- Հայաստանի Հանրապետութեան Ազգային անվտանգութեան ծառայութեան (ԱԱԾ) աշխատակիցները, յանցաւորութեան դէմ պայքարին ուղղուած իրենց գործառոյթներու իրականացման շրջագիծին մէջ, 16 Յունիսին, Էջմիածին քաղաքին մէջ, երկու տարբեր քրէական գործերով միաժամանակ իրականացուցած են խուզարկութիւններ, որոնց ծիրին մէջ յայտնաբերուած է ապօրինի պահուող մեծ քանակութեամբ զէնք եւ ռազմամթերք:

ԱԱԾի քննչական վարչութեան մէջ քննուող՝ «Տոն Պիպօ» կեղծանունով ծանօթ Արթուր Ասա-տրեանին պատկանող առանձնատան, կից շինութիւններուն եւ այլ տարածքներու մէջ կատարուած խուզարկութիւններէ ետք յայտնաբերուած է ապօրինի պահուող զէնք եւ ռազմամթերք: Արթուր Ասատրեան ձերբակալուեցաւ: Նոյն քրէական գործով ձերբակալուած են նաեւ 4 անձեր, որոնք Ռուսիոյ քաղաքացիներ են:

Ազգային անվտանգութեան ծառայութեան կողմէ իրականացուած հետախուզական միջոցառումներուն հիմամբ՝ տուեալներ ստացուած են, որ Հայաստանի Ազգային ժողովի պատգամաւոր, Երկրապահ կամաւորականներու միութեան (ԵԿՄ) նախագահ Մանուէլ Գրիգորեան այլ անձերու հետ նախնական համաձայնութեամբ ապօրինի կերպով ձեռք բերած եւ պահած է զէնք եւ ռազմամթերք:

Դէպքին առիթով ԱԱԾ քննչական վարչութիւնը յարուցեց քրէական գործ եւ խուզարկութիւններ իրականացուց Մանուէլ Գրիգորեանի տան, ամարանոցին եւ անոր պատկանող այլ տարածքներու մէջ: Յայտնաբերուած է ապօրինի կերպով պահուող մեծ քանակով զէնք եւ ռազմամթերք:

Ազգային ժողովի պատգամաւոր Մանուէլ Գրիգորեանը ձերբակալուեցաւ նախատեսուած յանցագործութիւն կատարելու կասկածանքով: Հայաստանի Հանրապետութեան սահմանադրութեան 96րդ յօդուածով սահմանուած կարգով, Ազգային ժողովի պատգամաւորը ազատութենէ զրկելու մասին տեղեկացուած է Ազգային ժողովի նախագահը:

Ազգային ժողովի Հայաստանի Հանրապետական կուսակցութեան (ՀՀԿ) խմբակցութեան պատգամաւոր Մանուէլ Գրիգորեանի ձերբակալման առիթով ՀՀԿն հրապարակեց յայտարարութիւն մը, որուն մէջ նշած է, թէ «Արցախի հերոս Մանուէլ Գրիգորեանի ձերբակալութիւնը պետական ճնշող քաղաքականութեան գործադրման հերթական ահազանգն է: Մենք (ՀՀԿն, «Ա.») մեր ուշադրութեան կեդրոնը պիտի պահենք այս հարցի լիարժէք եւ անաչառ քննութիւնը եւ պիտի պայքարինք Մանուէլ Գրիգորեանի իրաւունքներու ամբողջական պաշտպանութեան համար»:

Վարչապետ Նիկոլ Փաշինեան Երկուշաբթի օր «Ֆէյսպուք»ի ուղիղ միացումով յայտարարեց, որ Մանուէլ Գրիգորեանի ձերբակալութիւնը կապուած է ոչ միայն ապօրինի զէնք-զինամթերք պահելու, այլ նաեւ զինուորներուն հասանելի ուտելիքը եւ տրուող օգնութիւնը գողնալուն հետ:

«Իշխանութիւնը պահելու համար մենք որեւէ անսկզբունք ու ապօրինի, վարկաբեկիչ փտածութեան ոլորտ չենք ուղղուիր: Կ՛ուզեմ յստակօրէն արձանագրել, որ Մանուէլ Գրիգորեանի ձերբակալութիւնը չէ կապուած միայն մեծ քանակով ապօրինի զէնք-զինամթերք պահելուն հետ: Ձերբակալութիւնը կապուած է նաեւ այն կասկածներուն հետ, ըստ որոնց ան ներգրաւուած է ապրիլեան պատերազմի ընթացքին զինուորներուն համար հաւաքուած օգնութիւնը իւրացնելու- գողնալուն մէջ: Կասկած կայ, որ, օրինակ, դպրոցականներուն կողմէ զինուորներուն համար ղրկուած ուտելիքը ան իւրացուցած է եւ անով կերակրած իր արջերն ու վագրերը: Հիմնաւորեալ կասկածներ կան, որ ան իւրացուցած է Ղարաբաղի ժողովուրդին ու բանակին ուղարկուած օգնութիւնները, եւ այդ կասկածները կը հիմնուին անոր առանձնատան ու անոր պատկանող տարածքներուն մէջ կատարուած խուզարկութիւններուն արդիւնքներով», յայտարարեց Փաշինեան:

Ըստ վարչապետին՝ ոչ ոք կը հերքէ, որ Մանուէլ Գրիգորեան Արցախի հերոս է, բայց նոյնիսկ հերոսներուն իրաւունք չէ տրուած դպրոցականներուն կողմէ զինուորներուն համար ղրկուած օգնութիւնները գողնալ եւ անով կերակրել իր կենդանիները: «Բացի այս, կասկածներ կան, որ Մանուէլ Գրիգորեանի կողմէ իւրացուած են բանակին համար նախատեսուած արհեստագիտական միջոցներ, մասնաւորապէս՝ ինքնաշարժներ: Այսօր, երբ մեր բանակը սպառազինութիւններու հետ կապուած հարց ունի, ինչո՞ւ պէտք է մասնաւոր անձի մը ենթակայութեան տակ ահռելի քանակով զէնք ըլլայ», նշեց վարչապետը:

Փաշինեան յայտարարեց, որ իր վարչապետութեան օրօք նման ապօրինութիւններ տեղ պիտի չունենան եւ հանդուրժելի պիտի չըլլան՝ անկախ անկէ, թէ որոնք կապուած են այդ ապօրինութիւններուն հետ՝ հերոսնե՞ր, թէ վարչապետի ընտանիքի ներկայացուցիչներ:

Խուզարկութեան ընթացքին յայտնաբերուած են նաեւ 71 միլիոն դրամ, 80,000 տոլար եւ 67,350 եուրօ գումարներ: Բացի այդ, Արմաւիր մարզի Արշալոյս գիւղի եւ Էջմիածին քաղաքի համապատասխան հասցէներով շինութիւններու մէջ կատարուած խուզարկութիւններու ընթացքին յայտնաբերուած են 33 ինքնաշարժներ, որոնց շարքին՝ «Ռոլս Ռոյս», «Թոյոթա Լենտ Քրուզըր», «Մերսետես», «Հեմըր», «Ռենճ Ռովըր», պահել խորհրդային արտադրութեամբ ինքնաշարժներ եւ զինուորական փոխադրամիջոցներ:

Նշենք, որ խուզարկութեան ընթացքին Մանուէլ Գրիգորեան քննութիւնները խոչընդոտելու, սպասուող պատասխանատուութենէն խուսափելու նպատակով կապ հաստատած է խուզարկութեան վայր գտնուող զաւակին հետ. ան վերջինիս հրահանգած է ոմն Ա.ին փոխանցել, որ ներկայանայ խուզարկութեան վայր եւ «ամէն ինչ իր վրայ վերցնէ»: Շուրջ երեսուն րոպէ անց տուեալ անձը ներկայացած է խուզարկութեան վայր եւ յայտնած, որ պահուող ամբողջ ռազմամթերքը կը պատկանի միայն իրեն:

Հայաստանի գլխաւոր դատախազ Արթուր Դաւթեան դիմեց վարչապետ Նիկոլ Փաշինեանին՝ Ազգային ժողովի պատգամաւոր Մանուէլ Գրիգորեանի նկատմամբ քրէական հետապնդում յարուցելուն եւ զայն ազատութենէն զրկելուն համաձայնութիւն տալու մասին Հայաստանի գլխաւոր դատախազի միջնորդութիւնը քննարկելու օրակարգով Հայաստանի կառավարութեան նախաձեռնութեամբ Ազգային ժողովի արտահերթ նիստ գումարելու համար:

Առ այդ. Նիկոլ Փաշինեանի գլխաւորութեամբ, արտահերթ նիստ հրաուիրեցաւ: Օրակարգին վրայ Ազգային ժողովի արտահերթ նիստ գումարելու եւ գլխաւոր դատախազի՝ Մանուէլ Գրիգորեանի նկատմամբ քրէական հետապնդում հարուցելու եւ ազատութենէ զրկելու համաձայնութիւն տալու մասին միջնորդութեան հաւանութիւն տալու նախագիծն է: Կառավարութիւնը միաձայնութեամբ կողմ քուէարկեց նախագիծին:

Մանուէլ Գրիգորեանը անձեռնմխելիութենէ զրկելու հարցը Ազգային ժողովը պիտի քննարկէ 19 Յունիսին, առաւօտեան ժամը 11ին:

Մինչ այդ, փաստաբան, Մանուէլ Գրիգորեանի պաշտպան Հրանդ Անանեան հրաժարեցաւ պատգամաւորին իրաւաբանական օգնութիւն ցոյց տալէ եւ դադրեցաւ անոր պաշտպանը ըլլալէն:

Նշելով, որ Կիրակի երեկոյեան, Էջմիածինի քաղաքապետ Կարէն Գրիգորեան «ֆէյսպուք»ի իր էջին վրայ գրած էր, թէ ինք հրաժարած է Էջմիածինի քաղաքապետի պաշտօնէն:

LEAVE A REPLY

Please enter your comment!
Please enter your name here