«Զինուորի Բաժին» Մակագրութեամբ Պահածոներ Յայտնաբերուած Են Նաեւ Մանուէլ Գրիգորեանի Արցախի Առանձնատան Մէջ. Նոր Բացայայտումներ

0
126

ԵՐԵՒԱՆ.- Հայաստանի յատուկ քննչական ծառայութեան (ՅՔԾ) եւ ԱԱԾ համագործակցուած քայլերուն իբրեւ արդիւնք եղած տեղեկութիւններուն հիման վրայ՝ իրաւական օգնութիւն ցոյց տալու մասին միջնորդութիւն ուղարկուած է Արցախի Հարնրապետութեան իրաւապահ մարմիններուն, որուն ծիրին մէջ 20 Յունիս 2018ի առաւօտեան, խուզարկութիւն կատարուեցաւ Արցախի Հանրապետութեան պաշտպանութեան բանակի N զօրամասին (Դաշկեսան) յարակից «Արա Լեռ» կոչուող տարածքին մէջ գտնուող, պատգամաւոր Մանուէլ Գրիգորեանին պատկանող առանձնատան մէջ: Այս մասին կը տեղեկացնեն ՅՔԾ լրատուական ծառայութենէն:

Խուզարկութեամբ յայտնաբերուած են «Զինուորի Բաժին» մակագրութեամբ մեծ քանակով միսի պահածոներ, ծխախոտ, զինուորական ներքնահագուստ եւ արտահագուստ, մաքրութեան պարագաներ, վիրակապեր, պենզին, մեծ քանակով գնդացիրի փամփուշտներ՝ 7.62 եւ 5.45 մմ. տրամաչափերով:

Քրէական գործի ծիրին մէջ, 19 Յունիսին, ապօրինի զէնք-զինամթերք պահելու կասկածանքով ձերբակալուեցաւ Մ. Գրիգորեանի բարեկամ Ա.Հ.ը:

Մանուէլ Գրիգորեանի վերաբերեալ քրէական գործի բոլոր հանգամանքներու լրիւ եւ իրական հետազօտման ուղղութեամբ տարուող քննչական գործողութիւններն ու անմիջական հետախուզական համագործակցուած քայլերը կը շարունակուին:

Նոր մանրամասնութիւններ եւ տեսանիւթը պիտի հրապարակուին յառաջիկային:

Նախաքննութիւնը կը շարունակուի:

Ծանօթ. ենթադրեալ յանցանքի մէջ կասկածելի կամ մեղադրեալ անձը կը համարուի անմեղ, քանի տակաւին անոր մեղաւորութիւնը ապացուցուած չէ Հայաստանի Հանրապետութեան քրէական դատավարութեան օրէնսգիրքով սահմանուած կարգով՝ դատարանի օրինական ուժի մէջ մտած դատավճիռով:

LEAVE A REPLY

Please enter your comment!
Please enter your name here