Մարտական Եւ Ռազմավարական Առումով Նախիջեւանի Ուղղութեամբ Փոփոխութիւն Տեղի Չէ Ունեցած. Հայաստանի Վարչապետ

0
169

ԵՐԵՒԱՆ.- Հայաստանի Հանրապետութեան վարչապետ Նիկոլ Փաշինեան հերքեց այն հրապարակումները՝ ըստ որոնց ատրպէյճանական կողմը Նախիջեւանի հետ սահմանին՝ Արենի գիւղին ուղղութեամբ, կարեւոր բարձունք մը գրաւած է: «Արմէնփրէս»ի համաձայն՝ «Ֆէյսպուք»ի էջին վրայ ուղիղ սփռումի ընթացքին, պատասխանելով Սամուէլ Չախալեանի հարցումին՝ վարչապետը ընդգծեց, որ այդպիսի բան տեղի չէ ունեցած, որովհետեւ այն տարածքները, որոնց հիմա կը տիրապետէ Ատրպէյճան, միշտ ալ եղած են Ատրպէյճանի հսկողութեան տակ: «Այսինքն, այս առումով որեւէ բան չէ փոխուած: Որոշ դիրքերու շարժ տեղի ունեցած է: Ըսեմ, թէ այն, ինչը Ատրպէյճան կը յայտարարէ՝ որ Երեւան-Լաչին ճամբան նշանառութեան տակ առած է, անոնք, որոնք տեղեակ չեն, յայտնեմ, որ 1992-1993 թուականէն այդ ճամբան նշանառութեան տակ է, եւ ճամբուն վրայ ազդեցութեան առումով փոփոխութիւն բացարձակապէս տեղի չէ ունեցած: Նախիջեւանի ուղղութեամբ տեղի ունեցած է դիրքերու որոշ տեղաշարժ: Ընդ որում, խօսիլ մեր կողմէ տարածքներու կորուստի մասին, ուղղակի անհեթեթութիւն է: Ինչպէ՞ս կը պատկերացնէք, որ որեւէ տարածք կորսուի առանց մէկ կրակոցի: Ատրպէյճան որոշ դիրքեր տեղաշարժած է տարբեր ուղղութիւններով. ես հիմա չեմ ուզեր անդրադառնալ այն նիւթին, թէ մենք որեւէ դիրքէ տեղաշարժ կատարած ենք, կամ ոչ, եւ ընդամէնը կ՛ուզեմ ըսել, որ մարտավարական եւ ռազմական առումով Նախիջեւանի ուղղութեամբ որեւէ բան չէ փոխուած, ունինք նոյն իրավիճակը, զոր ունէինք քանի մը ամիս առա»ջ, ըսաւ վարչապետը:

Ան աւելցուց, որ այնտեղ տեղի ունեցած է դիրքերու որոշ տեղափոխութիւն, որուն պատճառով իրավիճակի լարում եղած է, սակայն ծայրէ ծայր անհեթեթութիւն է այն քարոզչութիւնը, զոր Ատրպէյճան կը կատարէ այս հարցին առնչութեամբ: «Մենք հիմա կ՛աշխատինք այդ ուղղութեամբ, որպէսզի այն մտավախութիւնները, մարտահրաւէրները եւ վտանգները, որոնք կրնան բխիլ իրադրութեան այսպիսի փոփոխութենէ, դարձնենք կառավարելի», յայտնեց Փաշինեան:

Անդրադառնալով տարածուած այն խօսակցութիւններուն՝ ըստ որոնց Ատրպէյճան վերաբնակեցուցած է Նախիջեւանի հատուածին մէջ գտնուող Գոյնութ գիւղը՝ վարչապետը յայտնեց, որ այդ գիւղի տարածքը կը շարունակէ մնալ մեր զինեալ ուժերուն տեսադաշտին մէջ եւ հսկողութեան տակ: «Ուրեմն, այնտեղ վերաբնակեցում կատարուած ըլլալու լուրերը անհեթեթութիւն են: Ռազմական վտանգի առումով՝ մեզի համար որեւէ էական եւ շօշափելի փոփոխութիւն տեղի չէ ունեցած: Չեմ ըսեր, որ մենք ընդհանրապէս որեւէ մտավախութիւն պէտք չէ ունենանք, սակայն չեմ ալ ըսեր, որ պէտք է առանաձնայատուկ լարուածութեան մէջ ըլլանք: Պէտք է մեր զգօնութիւնը պահենք բոլոր ուղղութիւններով, այդ կարգին՝ Նախիջեւանի հատուածին մէջ», եզրափակեց վարչապետը:

LEAVE A REPLY

Please enter your comment!
Please enter your name here