Պաքուի Մէջ Կայացած Շքերթի Ընթացքին Ալիեւ Ռազմաշունչ Յայտարարութիւններ Կատարեց

0
105

ԵՐԵՒԱՆ, «Ազատութիւն».-  26 Յունիսին Պաքուի մէջ կայացած ռազմական շքերթին ընթացքին Ատրպէյճանի նախագահ Իլհամ Ալիեւ ըսած է, թէ Պաքու համաձայն է Արցախի հակամարտութեան խաղաղ կարգաւորման՝ միաժամանակ սպառնալով սակայն, թէ աւարտած է պատերազմին միայն առաջին հանգրուանը։

Ան կրկնած է, թէ Հայաստան պէտք է հեռանայ Արցախէն եւ պնդած է, թէ ատրպէյճանական բանակը «ի զօրու է ոչնչացնելու ռազմական որեւէ թիրախ»:

Ատրպէյճանի բանակի հիմնադրութեան 100-ամեակին նուիրուած այս զինուորական շքերթին ընթացքին Ալիեւ աւելցուցած է. «Լեռնային Ղարաբաղը ատրպէյճանական տարածք է, եւ Պաքու երբե՛ք պիտի չընդունի Ղարաբաղի բռնագրաւումը։ Ատրպէյճան պիտի վերականգնէ իր հսկողութիւնը Ղարաբաղի եւ յարակից գրաւեալ տարածքներուն վրայ»:

Ան պնդած է, թէ երկրին ռազմական ծախսերը 2003-էն ի վեր աճած են 15 անգամով՝ աւելցնելով, թէ այժմ բանակը զինուած է ամենաարդիական սպառազինութիւններով եւ կը զարգանայ անոր ռազմարդիւնաբերութիւնը:

Ալիեւ ապա «յաղթանակ» որակած է 2016-ի Ապրիլեան պատերազմը եւ «2018-ի նախիջեւանեան գործողութիւնը»:

Նշենք, որ Հայաստանի վարչապետ Նիկոլ Փաշինեան Յունիս 25ին յայտնած էր, թէ Ատրպէյճան ռազմական որոշ դիրքեր տեղաշարժի ենթարկած է Նախիջեւանի տարբեր ուղղութիւններով, սակայն մարտավարական եւ ռազմական առումով՝ որեւէ էական փոփոխութիւն տեղի չէ ունեցած: «Այն տարածքները, որոնց այժմ տիրապետում է Ատրպէյճանը, միշտ էլ եղել են Ատրպէյճանի հսկողութեան տակ, եւ խօսել հայկական կողմի ինչ որ տարածքների կորստի մասին՝ ուղղակի անհեթեթութիւն է», ըսած էր Փաշինեան:

Պաքուի կեդրոնական հրապարակին վրայ կայացած ռազմական շքերթին մասնակցած են մօտաւորապէս 4000 զինուորներ, 70 ռազմական օդանաւեր եւ 240 ռազմական այլ սարքեր: Ռուսական սպառազինութիւններէն բացի, շքերթին ցուցադրուած են նաեւ պելոռուսեան «Փոլոնեզ» եւ իսրայէլեան «Լորա» տեսակի հրթիռային համակարգեր: «Հիւրրիյէթ» թերթը գրած է, որ ցուցադրուած են նաեւ թրքական արտադրութեամբ հեռահաս հրթիռներ:

Ցուցադրական թռիչքներուն մասնակցած են նաեւ թրքական օդուժէն տասնեակ մը ռազմական օդանաւեր, իսկ շքերթին ներկայ եղած են Թուրքիոյ սպայակոյտի պետ Հուլուսի Աքար, որ անջատ հանդիպում մը ունեցած է Իլհամ Ալիեւի հետ:

Ռազմական շքերթին ներկայ եղած են նաեւ քանի մը տասնեակ երկիրներէ բարձրաստիճան ներկայացուցիչներ։

LEAVE A REPLY

Please enter your comment!
Please enter your name here