«Հայ Եկեղեցւոյ Հզօրութիւնն Ու Մեծութիւնը Իր Ժողովրդանուէր Ծառայութեան Մէջ Է» Շեշտեց Արամ Ա. Կաթողիկոս

0
138

Կիրակի, 1 յուլիս 2018-ի առաւօտուն, Անթիլիասի մայրավանքին մէջ, ինչպէս նաեւ Մեծի Տանն Կիլիկիոյ կաթողիկոսութեան բոլոր եկեղեցիներուն մէջ, յընթացս Ս. եւ անմահ պատարագին, Արամ Ա. կաթողիկոսին ընտրութեան եւ օծման 23-րդ տարեդարձին առիթով տեղի ունեցաւ Հայրապետական մաղթանք: Ս. եւ անմահ պատարագին հանդիսապետեց վեհափառ հայրապետը, պատարագը մատուցեց եւ քարոզեց Թեհրանի հայոց թեմի առաջնորդ Սեպուհ արք. Սարգիսեան, իսկ պատարագին երգեցողութիւնը կատարեց, առաջին անգամ ըլլալով, Քրիստոնէական դաստիարակութեան բաժանմունքի մանկապատանեկան երգչախումբը` ղեկավարութեամբ Մեղրիկ եպս. Բարիքեանի:

Պատարագին ներկայ էին Ասիոյ եկեղեցիներու խորհուրդի Գործադիր վարչութեան անդամները եւ հաւատացեալներու հոծ բազմութիւն մը:

Արարողութեան ընթացքին տեղի ունեցաւ աւետարանական հատուածներու եւ աղօթքներու ընթերցում. միաբան հայրեր Ս. խորանէն կատարեցին Հայրապետական մաղթանքը:

Հայրապետական մաղթանքէն ետք, պատարագիչ սրբազանը իր քարոզին մէջ յայտնեց, որ Հայոց ցեղասպանութեան արհաւիրքէն ետք, Ս. աթոռը Անթիլիասի ամայի աւազներուն վրայ հաստատուեցաւ ու ամայի վայրը ծաղկեցուց եւ վերածնունդ ապրեցուց շնորհիւ իր առաքելութեան: Ան շնորհաւորելով Արամ Ա. վեհափառ հայրապետին ընտրութեան եւ օծման 23-րդ տարեդարձը յայտնեց, որ պատահական չէր, որ վեհափառի օծման արարողութեան Անթիլիաս ժամանած էին եկեղեցիներու հոգեւոր պետեր եւ համաշխարհային ու միջազգային քաղաքական ոլորտի բարձրաստիճան պաշտօնատարներ. բան մը, որ ապացոյց է Ս. աթոռին ու տարագրեալ ժողովուրդին վերակենդանութեան: Ան շարունակեց յայտնելով, որ մինչեւ օրս, շնորհիւ յարատեւ աշխատանքի ու ամուր հաւատքի, Անթիլիասը կը շարունակէ հանդիպման վայր ըլլալ զանազան միջազգային ու համաշխարհային ժողովներու ու կը վայելէ բոլորին յարգանքը, որովհետեւ գիտցաւ Քրիստոսի օրինակին հետեւիլ ու գողգոթայէն ետք վերածնիլ:

Ապա, հայրապետական թափօրը ուղղուեցաւ վեհարան, ուր գործադրուեցաւ գեղարուեստական յայտագիր մը` ի պատիւ վեհափառ հայրապետին: Հոս եւս մանկապատանեկան երգչախումբը ներկայացուց փունջ մը ազգային ու հոգեւոր երգեր, իսկ Վաչէ վրդ. Պալըքճեան արտասանեց միաբանութեան ուղերձը:

Աւարտին խօսք առնելով վեհափառ հայրապետը յայտնեց, որ հայրապետական մաղթանքի ճամբով մենք Աստուծոյ կ՛աղօթենք, որ պայծառ պահէ եկեղեցին, իսկ եկեղեցւոյ իմաստը ո՛չ թէ քարեղէն շէնքն է, այլ` անոր առաքելութիւնը: «Եկեղեցին Քրիստոսի կենդանի ու պայծառակերպիչ ներկայութիւնն է հաւատացեալներու անհատական ու հաւաքական կեանքին մէջ: Եկեղեցին ճշմարտօրէն եւ ամբողջականօրէն եկեղեցի կը դառնայ, երբ իր ծառայութեան ու առաքելութեան ճամբով աւետարանական ճշմարտութիւնները եւ արժէքները, այլ խօսքով` զՔրիստոս կը տանի ժողովուրդին», ըսաւ վեհափառ հայրապետը` աւելցնելով. «Յաճախ կը կրկնեմ, որ մենք կոչուած ենք եկեղեցին պատէն անդին` ժողովուրդին տանելու ու այդպէս եկեղեցի դառնալու հրամայականին»:

«Այսօր, մենք բոլորս, ինձմէ սկսեալ, կը վերանորոգենք մեր ուխտը մեր ժողովուրդին ծառայելու որպէս բարի սամարացի, բուժելու մեր ժողովուրդին վէրքերը, օգտակար ըլլալու մեր ժողովուրդի կարիքներուն` եկեղեցւոյ, հայ դպրոցին ու մշակոյթին ճամբով, դառնալու տէրն ու պաշտպանը հայ ժողովուրդի արդար իրաւունքներուն: Ա՛յս է եւ պիտի շարունակէ ըլլալ Անթիլիասի առաքելութիւնը», եզրափակեց վեհափառ հայրապետը:

Ապա, մանկապատանեկան երգչախումբը վեհարանի դահլիճը թնդացուց Հայրապետական մաղթերգով, իսկ վեհափառ հայրապետը իր ջերմ գնահատանքն ու օրհնութիւնը փոխանցեց փոքրիկներուն ու անոնց ծնողներուն եւ յատկապէս ղեկավար սրբազան հօր:

LEAVE A REPLY

Please enter your comment!
Please enter your name here