«Զարմանազան» Արեւմտահայերէնի Ճամբարին 10,000 Տոլարի Նուիրատուութիւն՝ «Melkonian Global Overture»էն

0
859

ԼՈՍ ԱՆՃԵԼԸՍ.- «Գալուստ Կիւլպէնկեան» հիմնարկութեան Հայկական համայնքներու բաժանմունքը Լոս Անճելըսի Melkonian Global Overture ոչ-հասութաբեր կազմակերպութենէն առատաձեռն նուիրատուութիւն մը ստացած է, որ պիտի յատկացուի այս ամառ «Զարմանազան» արեւմտահայերէնի ճամբարին մասնակցող երիտասարդներու ծախսերուն:

Տասը հազար տոլարի նուիրատուութիւնը պիտի տրամադրուի տարբեր երկիրներէ (Լիբանան, Յունաստան, Միացեալ Նահանգներ, Թուրքիա, Գանատա եւ Ֆրանսա) եկող 11 համալսարանական ուսանողներու արձանագրութեան ծախսերը փակելու:

Հայկական համայնքներու բաժանմունքը 2017ին ձեռնարկեց «Զարմանազան» կրթական նախագիծին, որ բաժանմունքի արեւմտահայերէնի ամրապնդման ծրագիրին մաս կը կազմէ: Անիկա կը կազմակերպուի L՛association Mille et un Mondes-ի (Լիոն, Ֆրանսա) եւ Institut National des Langues et Civilisations Orientales-ի (INALCO) (Փարիզ, Ֆրանսա) գործակցութեամբ:

«Զարմանազան» ճամբարը վկայուած է Ֆրանսայի երիտասարդութեան եւ մարզանքի նախարարութեան կողմէ:

Այս տարի, «Զարմանազան»ը տեղի պիտի ունենայ Ֆրանսայի Ալպեան լեռներու շրջանին մէջ, 15 Յուլիսէն մինչեւ 9 Օգոստոս: Անոր պիտի մասնակցին 10էն 15 տարեկան աւելի քան 50 պատանիներ եւ 16էն 24 տարեկան 29 երիտասարդներ: Ճամբարը չորս երկիրներէ եկող 15 ուսուցիչներու յատուկ վարժընթացի բաժին մըն ալ պիտի ունենայ: Ամբողջ գործունէութիւնը հայերէնով կ՛ընթանայ:

«Շատ երախտապարտ ենք այս աջակցութեան համար:Քաջալերական է տեսնել, որ նուիրատուները արդէն կ՛ըմբռնեն «Զարմանազան»ի արժէքը՝ իրենց նիւթական նպաստը բերելով, որպէսզի երիտասարդ տղաք եւ աղջիկներ ճամբարին կարենան մասնակցիլ», յայտնեց Հայկական համայնքներու բաժանմունքի տնօրէն Ռազմիկ Փանոսեան։

««Զարմանազան»ը հայերէնի ու հայ մշակոյթի փորձառութիւնը ապրելու նորարար, դրական ու ստեղծագործական հարթակ մըն է երիտասարդութեան համար: Որոշեցինք այս կրթաթոշակները տրամադրել՝ Գրիգոր եւ Կարապետ Մելգոնեաններու յիշատակին, ներշնչուելով անոնց բարեգործութենէն ու աշխարհասփիւռ հայերու կրթութեան օժանդակելու ցանկութենէն», յայտնեց Melkonian Global Overture-էն Արսինէ Շիրվանեան:

Յաւելեալ տեղեկութիւններու համար, հաճեցէք այցելել՝ https://gulbenkian.pt/armenian-communities կայքէջը:

LEAVE A REPLY

Please enter your comment!
Please enter your name here