Իրան Միջազգային Ատեանին Բողոք Ներկայացուց Մ.Նահանգներու Դէմ

0
274

ԹԵՀՐԱՆ, «Փրես Թի.Վի.».- Իրանի արտաքին գործոց նախարար Մոհամմետ Ճաւատ Զարիֆ յայտարարեց, թէ Իրան 16 Յուլիսին պաշտօնապէս դիմած է ՄԱԿի հովանիին տակ գործող Միջազգային արդարադատութեան ատեանին, բողոք ներկայացնելով Իրանի դէմ միակողմանի պատժամիջոցներ սահմանելու Ուաշիկթընի որոշումին գծով:

«Իրան միջազգային ատեանին բողոքած է, որպէսզի Միացեալ Նահանգներ պատասխանատուութիւն կրէ միակողմանի պատժամիջոցները երկրորդ անգամն ըլլալով անօրինական կերպով սահմանելու որոշումին համար: Իրան յանձնառու է օրէնքի գերակայութեան՝ Միացեալ Նահանգներու կողմէ դիւանագիտութեան եւ իրաւական պարտաւորութիւններու արհամարհումին դիմաց: Անհրաժեշտ է դիմակայել միջազգային օրէնքը խախտելու ամերիկացիներու սովորութիւնը», կ՛ըսուի նախարարութեան յայտարարութեան մէջ: Նախագահ Տանըլտ Թրամփ 8 Մայիսին յայտարարած էր, որ Ուաշինկթըն դուրս կու գայ Իրանի հիւլէական ծրագիրին շուրջ գոյացած համաձայնագիրէն, որ 2015ին կնքուած էր Վեցեակի (Միացեալ Նահանգներ, Ռուսիա, Բրիտանիա, Չինաստան, Ֆրանսա եւ Գերմանիա) եւ Իրանի միջեւ: Թրամփ նաեւ յայտարարած էր վերականգնումը բոլոր այն պատժամիջոցներուն, որոնց գործադրութիւնը սառեցուած էր համաձայնագիրի կնքումով:

LEAVE A REPLY

Please enter your comment!
Please enter your name here