Փութին «Շինիչ Եւ Անկեղծ» Կը Նկատէ Թրամփի Հետ Հանդիպումը

0
284

ՀԵԼՍԻՆՔԻ.- Ռուսիոյ նախագահ Վլատիմիր Փութին Հելսինքիի մէջ Միացեալ Նահանգներու նախագահ Տանըլտ Թրամփի հետ իր հանդիպումէն քանի մը ժամ ետք հարցազրոյց մը ունեցաւ Թրամփի խօսափողը հանդիսացող «Ֆաքս» պատկերասփիւռի կայանին հետ, դարձեալ հերքելով այն ամբաստանութիւնները, թէ Մոսկուա միջամտած է 2016ի ամերիկեան նախագահական ընտրութիւններուն եւ անուղղակի պատասխան մը տալով այն հարցումին, թէ իր տրամադրութեան տակ ունի՞ այնպիսի տեղեկութիւններ, որոնք կրնան վարկաբեկել Թրամփը։ Փութին յայտնեց, թէ Մոսկուա Թրամփով հետաքրքրուած չէր, մինչեւ այն ատեն, որ ան 2016ի նախագահական ընտրութիւններուն թեկնածու դարձաւ։ «Յուսամ չեմ վիրաւորեր զինք, սակայն մինչ այդ, ան պարզապէս հարուստ անձ մըն էր, որ շինարարական ծրագիրներով եւ գեղեցկուհիներու մրցումներով կը զբաղէր», ըսաւ ան՝ ընդունելով, որ իր նախընտրութիւնն էր, որ Թրամփ յաղթանակ արձանագրէ, «որովհետեւ ան խոստացաւ Ռուսիոյ հետ յարաբերութիւնները բարելաւել»:

Փութին յայտնեց, որ հանդիպումը «շինիչ եւ անկեղծ» էր՝ աւելցնելով, որ Ուաշինկթըն եւ Մոսկուա կրնան գործակցիլ Սուրիոյ տագնապին լուծման համար եւ գաղթականներու տունդարձի հարցին շուրջ:

Իրանի գծով, Փութին ըսաւ, որ Թրամփին յայտնած է Թեհրանի հետ կնքուած համագործակցութեան համապարփակ գործողութիւններու համաձայնագիրէն Ուաշինկթընի դուրս գալուն վերաբերեալ Ռուսիոյ մտահոգութիւնը՝ նշելով. «Ուաշինկթըն գիտէ, թէ Իրանի նկատմամբ մեր սկզբունքային կեցուածքը չէ փոխուած»:

LEAVE A REPLY

Please enter your comment!
Please enter your name here