Աղթամարի Ս. Խաչ Եկեղեցւոյ Պատարագի Սեմին՝ Եկեղեցւոյ Կից Գերեզմաննոցը Կը Սրբապղծուի

0
252

ԵՐԵՒԱՆ.- Մինչ պատրաստութիւնները կը շարունակուին Աղթամար կղզիի Ս. Խաչ եկեղեցւոյ մէջ 9 Սեպտեմբերին մատուցուելիք Ս. պատարագին, «Էրմենիհապեր»ը կը հաղորդէ, որ եկեղեցւոյ կից հայկական գերեզմաննոցը վերածուած է ժամանցի եւ դաշտահանդէսներու վայրի մը:

Թէեւ կղզիին մէջ կան ապահովութեան աշխատակիցներ (որոնք աւելի մտահոգ են եկեղեցւոյ մէջ աղօթողներով), զբօսաշրջիկները ազատօրէն կը քալեն գերեզմաննոցին մէջէն եւ նոյնիսկ հոն խնճոյք կ՛ընեն՝ վնաս հասցնելով գերեզմանաքարերուն եւ սր-բապղծելով տարածքը: 10րդ դարու քանդակագործութեան բնորոշ ոճով քանդակուած շիրմաքարերուն մեծ մասը աւերուած է արդէն:

Հակառակ անոր որ թրքական ապահովական մարմինները ա-կանատես են եկեղեցւոյ եւ գերեզմաննոցին հասնող վնասներուն, անոնք դիտաւորեալ կերպով աչք կը փակեն սրբապղծումին դիմաց, մինչ, միւս կողմէ, պետութիւնը մեծ գումարներ կը շահի կղզին այցելող զբօսաշրջիկներէն:

Մինչ այդ, վերոյիշեալ պատարագի նախապատրաստական աշխատանքները կը համակարգուին Վանի նահանգապետարանին կողմէ՝ համապատասխան հաստատութիւններու մասնակցութեամբ:

Վանի զբօսաշրջութեան զարգացման տեսանկիւնէն կարեւոր նշանակութիւն ունեցող Ս. Խաչ եկեղեցւոյ մէջ այս տարի մատուցուող պատարագին առիթով, կ՛ակնկալուի զբօսաշրջիկներու մեծ հոսք: Կը նշուի, որ Վանի մէջ ամբողջութեամբ սպառած է հիւրանոցներու ամրագրման հնարաւորութիւնը: Վան պիտի այցելեն թէ՛ ներքին զբօսաշրջութեամբ հետաքրքրուողներ եւ թէ արտասահմանցի զբօսաշրջիկներ, մասնաւորպէս՝ Հայաստանէն եւ Իրանէն:

Վանի առեւտրա-արդիւնաբերեկան պալատը զգուշացումներ ըրած է առեւտրականներուն՝ ծառայութիւններու մատուցման հարցերով: Պալատի ներկայացուցիչ Ֆարուք Պիներ նշած է, որ Վանը «հոգեւոր զբօսաշրջութեան» համար կարեւոր կեդրոն է: Ան յորդորած է տեղացի եւ արտասահմանցի զբօսաշրջիկներու հանդէպ յարգալից ըլլալ եւ անպայման ուշադրութիւն դարձնել սպասարկման որակին, ճաշարաններուն, սրճարաններուն, հիւրանոցներուն եւ առեւտրական կեդրոններու ապրանքներու գիներուն:

«Մեր նահանգին մէջ այնպիսի ուրախ միջավայր պէտք է ստեղծենք, որ միւս տարիներուն աւելի մեծնայ զբօսաշրջութեան թիւը: Բոլորը իրենց հնարաւորութեան սահմաններուն մէջ պէտք է աջակցին, որպէսզի Վանը դառնայ կրօնական, զբօսաշրջական եւ առեւտրական կեդրոն», ըսած է ան:

LEAVE A REPLY

Please enter your comment!
Please enter your name here