Ռոպերթ Քոչարեան Պիտի Մասնակցի Յառաջիկայ Խորհրդարանական Արտահերթ Ընտրութիւններուն

0
232

ԵՐԵՒԱՆ.- Հայաստանի երկրորդ նախագահ Ռոպերթ Քոչարեան պիտի մասնակցի յառաջիկայ խորհրդարանական արտահերթ ընտրութիւններուն: Ըստ «Արմենփրես»ի՝ այս մասին Քոչարեան յայտնած է «Սփութնիք Արմէնիա»ին տուած հարցազրոյցին ընթացքին:

Ան համարած է, որ տակաւին շուտ է խօսիլ, թէ ինչ ձեւաչափով ու քաղաքական խումբով պիտի մասնակցի ընտրութիւններուն՝ աւելցնելով, թէ երկար ժամանակ կայ, իսկ իրավիճակը շատ արագ կը փոխուի: «Չեմ կարծեր, որ հիմա ճիշդ է ձեւաչափերու մասին խօսիլը: Հիմա պէտք է կազմակերպչական քայլերով ձեւաւորել այն միաւորը, որով դուն ներկայացած ես քաղաքական դաշտին մէջ, այն թիրախները, որոնց ուղղուած պիտի ըլլայ քու գործունէութիւնը, եւ այն ընտրողներու զանգուածը, որուն մասին կը մտածես, որ կրնան ըլլալ ապագայ յենարանդ: Այս է այս պահու հիմնական հարցը», ըսած է Քոչարեան:

Քոչարեան չէ բացառած, որ կրնայ դառնալ ընդդիմադիր բեւեռի կեդրոն կամ կեդրոններէն մէկը: «Առաջին հերթին կը փորձեմ յոյսս դնել իմ վրայ եւ շուրջս միաւորուող ուժերու ընտրազանգուածին՝ քաղաքացիներու վրայ: Որքան այդ ուժը հզօր ըլլայ, այնքան մեծ պիտի ըլլայ դաշինքներ կազմելու հնարաւորութիւնը», ընդգծած է ան՝ առանց փափաքելու, սակայն, անուններ տալ հնարաւոր դաշինքի անդամ քաղաքական ուժերուն վերաբերեալ:

Քոչարեան նշած է, որ իր քաղաքական յենարանը կը համարէ Հայաստանի այն քաղաքացիները, որոնք կը յիշեն իր պաշտօնավարման տարիներու յաջողութիւնները:

LEAVE A REPLY

Please enter your comment!
Please enter your name here