Տիգրանակերտէն Երեւան Օդանաւային Կապ Հաստատելու Ծրագիր

0
322

ՊՈԼԻՍ, «Մարմարա».- Հայաստանի Արդիւնաբերողներու եւ գործարարներու միութեան անդամները ընդունած են Տիգրանակերտի Առեւտրական եւ ճարտարարուեստի գրասենեակի նախագահի օգնական եւ հիմնադիր անդամ Հիւսնիւ Փերվանէի գլխաւորած գործարարներու պատուիրակութիւնը։

Հիւր պատուիրակութեան անդամները յայտնած են, որ կ՛ուզեն Հայաստանի հետ ո՛չ միայն տնտեսական փոխյարաբերութիւնները զարգացնել, այլեւ երկու երկիրներուն միջեւ դիւանագիտական կապեր հաստատել։

Հայաստանի Արդիւնաբերողներու եւ գործարարներու միութեան նախագահ Արսէն Ղազարեան պատասխանած է, որ Հայաստանի կառավարութիւնը դրական քայլ կը նկատէ անհամաձայնութիւններուն վերջ տալու կոչուած իւրաքանչիւր ձեռնարկ եւ զօրավիգ կը կանգնի այդ ուղղութեամբ կատարուելիք ամէն աշխատանքի։

Տիգրանակերտի գործարարները յայտնած են նաեւ, որ իրենց նպատակն է Տիգրանակերտի եւ Երեւանի միջեւ օդանաւային թռիչքներ հաստատել, ուստի այս ուղղութեամբ հայաստանեան միութենէն եւս զօրակցութիւն կ՛ակնկալուի։ Իսկ Արսէն Ղազարեան, ի պատասխան յայտնեց, որ իրենց միութիւնը 2009ին եւս Երեւան-Վան թռիչքներ կազմակերպած էր, նոյնիսկ օդանաւի տոմսակներ ծախուած էին, սակայն վերջին վայրկեանին Թուրքիոյ կողմէ բանեցուած քաղաքական պատճառներով՝ այդ թռիչքները ջնջուե-ցան։

Ղազարեան հիւրերուն վստահեցուցած է, որ հայաստանեան միութիւնը թռիչքի այս ծրագիրները կեանքի կոչելու համար ջանք պիտի թափէ։

Տիգրանակերտցի գործարարներէն մէկը այս առիթով ըսած է. «Անցեալին հայերը մեզի կը սորվեցնէին լաւաշ հաց պատրաստել, պղինձի ձուլածոն գործածել, գորգ հիւսել եւ այլ բաներ։ Հայերը երբ քաղաքէն հեռացան, մենք մնացինք առանց մշակոյթի։ Այսօր, երբ Տիգրանակերտի մասին որեւէ ծանուցման տեսանիւթ պատրաստուի, առաջին կարգին հայկական մշակոյթն է, որ իր երգերով ու այլ նիւթերով հրապարակ կու գայ»։

LEAVE A REPLY

Please enter your comment!
Please enter your name here