Լեւոն Արք. Զէքիեան Այցելեց Երեսփոխան Բագրատունիի

0
303

Թուրքիոյ Հայ կաթողիկէ առաջնորդ եւ Մխիթարեան միաբանութեան քահանայապետական պատուիրակ Լեւոն արք. Զէքիեան այցելեց «Շաղզոյեան» կեդրոն եւ հանդիպում ունեցաւ ՀՅԴ Լիբանանի Կեդրոնական կոմիտէի ներկայացուցիչ, երեսփոխան Յակոբ Բագրատունիի հետ: Զէքիեան արքեպիսկոպոսին կ՛ընկերակցէր Լիբանանի եւ Միջին Արեւելքի Մխիթարեան միաբանութեան մեծաւոր հայր Մեսրոպ Սիւլահեան:

Մէկուկէս ժամ տեւած հանդիպումը առիթ մը եղաւ արծարծելու Հայաստանի մէջ արձանագրուող փոփոխութիւնները, թրքահայութեան ներկայ իրավիճակը, Լիբանանի ազգային հասարակական կեանքը, ինչպէս նաեւ Մխիթարեան միաբանութեան հետ առնչուող խնդիրներ:

Իբրեւ խոհուն մտաւորական եւ հայութեան ինքնութեան պահպանման խորապէս հաւատացող անձնաւորութիւն, Զէքիեան արքեպիսկոպոս արտայայտեց իր մտածումներն ու մտահոգութիւնները, որոնք ամբողջութեամբ կը համընկնին ինքնութեան պահպանման գծով ՀՅ Դաշնակցութեան լիբանանեան ընտանիքի պատկերացումներուն:

Հանդիպման ընթացքին երեսփոխան Բագրատունի վեր առաւ Մխիթարեան միաբանութեան դարաւոր առաքելութեան արժէքը` միաժամանակ անհրաժեշտ նկատելով հայկական արժէքային համակարգին համահայկական ճիգերով վերադառնալու հրամայականը:

LEAVE A REPLY

Please enter your comment!
Please enter your name here