Հայաստանի Եւ Ատրպէյճանի ԱԳ Նախարարները Կ՛որոշեն Երկխօսութիւնը Շարունակել

0
223

ԵՐԵՒԱՆ, «Արմէնփրէս».- ԵԱՀԿ Մինսկի խմբակի համանախագահներ Իկոր Փոփովի (Ռուսիա), Սթեֆան Վիսքոնթիի (Ֆրանսա) ու Էնտրու Շոֆըրի (Միացեալ Նահանգներ) միջնորդութեամբ եւ մասնակցութեամբ, Նիւ Եորքի մէջ Սեպտեմբեր 26ին տեղի ունեցաւ Հայաստանի արտաքին գործոց նախարար Զօհրաբ Մնացականեանի եւ Ատրպէյճանի արտաքին գործոց նախարար Էլմար Մամետեարովի հանդիպումը: Հանդիպման ներկայ եղաւ նաեւ ԵԱՀԿի գործող նախագահի անձնական ներկայացուցիչ Անճէյ Քասփըրչիք:

Հայաստանի արտաքին գործոց նախարարութեան մամլոյ, տեղեկատուութեան եւ հասարակայնութեան հետ կապի վարչութիւնը կը տեղեկացնէ, թէ հանդիպումը սկսած է ընդլայնուած ձեւաչափով, ապա արտաքին գործոց նախարարները առանձնազրոյց ունեցած են: Մնացականեան վերահաստատած է Արցախի հակամարտութեան բացառապէս խաղաղ կարգաւորման վերաբերեալ Հայաստանի դիրքորոշումն ու մօտեցումները:

Տեղի ունեցած է նաեւ միտքերու օգտակար փոխանակում՝ հիմնահարցին կարգաւորման շուրջ, ուղղուած տարածաշրջանին մէջ կայուն խաղաղութեան հաստատման: Զրուցակիցները համաձայնած են շարունակել երկխօսութիւնը, յատկապէս՝ յառաջիկային ԵԱՀԿի համանախագահներուն տարածաշրջան կատարելիք այցելութեան ծիրէն ներս՝ մինչեւ տարեվերջ:

«Ազատութիւն» կայանը, իր տեղեկութիւնը քաղելով ատրպէյճանական «Թուրան» լրատու գործակալութենէն՝ կը հաղորդէ, որ Մամետեարով եւս «միտքերու կարեւոր եւ հետաքրքրական փոխանակման առիթ» կոչած է սոյն հանդիպումը։

LEAVE A REPLY

Please enter your comment!
Please enter your name here