Ֆրանսախօս Երկիրներու Գագաթնաժողովին Նուիրուած Համերգի Եզրափակիչ Հատուածը Նուիրուած Պիտի Ըլլայ Շարլ Ազնաւուրին

0
228

Հայաստանի մէջ տեղի ունենալիք Ֆրանսախօս երկիրներու կազմակերպութեան (ՖՄԿ) գագաթնաժողովի ծիրին մէջ Հանրապետութեան հրապարակին վրայ 11 Հոկտեմբերին կայանալիք փակման համերգի եզրափակիչ հատուածը ամբողջութեամբ նուիրուած պիտի ըլլայ Շարլ Ազնաւուրին: Այս մասին Հայաստանի արտաքին գործոց նախարարութեան մէջ հրաւիրուած ասուլիսին ընթացքին յայտնեց արտաքին գործոց նախարարութեան գլխաւոր քարտուղար, ՖՄԿ գագաթնաժողովի իրականացման արտաքին գործոց նախարարութեան աշխատանքային յանձնախումբի ղեկավար Վահագն Մելիքեան:

«Հայեցակարգային առումով հետաքրքրական լուծումներով համերգ նախատեսուած է՝ հին Հայաստանէն սկսած մինչեւ մեր օրերը: Աւարտական մասը ամբողջութեամբ նուիրուած պիտի ըլլար Շարլ Ազնաւուրին. նախատեսուած էր իր անմիջական մասնակցութիւնը, իր նուագախումբով: Քանի որ ան միշտ բեմի վրայ եղած է, իրեն այդպէս պատկերացուցած է, ապա մենք այդ մասը պիտի պահպանենք: Այնպիսի լուծումներ գտած ենք, որ Շարլ Ազնաւուրի բացակայութիւնը որեւէ կերպով չզգացուի: Համերգի այդ հատուածը շատ աւելի մեծ շեշտադրումներով պիտի ըլլայ: Չեմ բացառեր, որ ըլլան նաեւ աշխարհահռչակ աստղեր, որոնք կը փափաքին իրենց մասնակցութիւնը բերել: Ասիկա բանակցային գործընթաց է, բնականաբար ամբողջական լուծումներ գտնուելու պարագային կը տեղեկացնենք», ըստ «Արմէնփրէս»ի, ըսաւ Մելիքեան:

Համերգի միւս մասին մէջ ելոյթ պիտի ունենան աշխարհահռչակ երգիչներ Անժէլիք Քիժօ, որ կը համարուի Ափրիկէ ցամաքամասի Սելին Տիոնը, Մելոտի Կարտօ եւ Զազ:

«Խնդրանք մեր բնակչութեան՝ այդ օրերուն բարձր ըմբռնումով մօտենալ կազմակերպչական հարցերուն: Պատկերացուցէք նոյն ժամանակ 40 կէտերէ պիտի շարուին ինքնաշարժներու շարանները, ամենաբանուկ փողոցները ուղղակի փակ պիտի ըլլան, որովհետեւ վայրկեանով հաշուած ժամանակագրութիւն կայ», յայտնեց Մելիքեան:

Համերգը պիտի սկսի 11 Հոկտեմբերին, երեկոյան ժամը 7։30ին, Հանրապետութեան հրապարակին վրայ:

LEAVE A REPLY

Please enter your comment!
Please enter your name here