ՊԱՏԱՌԻԿՆԵՐ…օրը օրին (Գ).

0
245

ՌՅ

«Առաւօտ լուսոյ, արեգակն արդար…»:

Առաւօտ կանուխ լուրը հասաւ, որ քաղաքապետարանի աւագանիի ընտրութեան յաղթական դիրքում է գտնւում վարչապետի թեկնածու Հայկ Մարութեանը վերջապէս, որին անձամբ ճանաչելու եւ հետը շփուելու բախտն ու առիթը չենք ունեցել, միայն գիտենք, որ երգիծանքի անուան տակ, տարիներ անընդմէջ,  հայաստանեան եթերը (TV) ողողել է ծամածռութիւններով, կապկութեամբ եւ տափակութիւններով յագեցուած իր հեղինակութեամբ տեսանիւթերով։ Սա չարախօսութիւն չէ եւ ոչ եւս անարգանք, գրաքննութիւն կամ թիւրատեսութիւն, միայն թէ չեմ կարծում, թէ որեւէ մէկը իր անհատականութիւնից կարող է շատ հեռանալ։ Այստեղ կարելի է յիշել այն ասացուածքը, որ եթէ յիմարները շուկայ չգնան, ապա անպէտք ապրանք առնող չի լինի։

Ողբամ մեր համայն հայութեան մայրաքաղաքի բնակչութեան որակական մակարդակը, որ 43 տոկոս մասնակիցների մօտ 81 տոկոս քուէարկութեամբ ընտրուած թեկնածուն (իրականում 81×43=35տոկոս) քաղաքը բաժանում է սեւ ու սպիտակի եւ ընտրողներին է դիմում «ժողովուրդ ջան» դիմելաձեւով, «Հայկո-Մկո»-ի տրամաբանութեան մէջ մնալով։ Յուսանք, որ քաղաքի ղեկը չի վարի այդ ներշնչումով եւ ժամանակի հետ փափկանկատութիւնը եւս իր տեղը կը գրաւի։

Ի՞նչ արած Ջորջ Բուշ տհասը ԱՄՆ-ը չղեկավարե՞ց։

 

24-09-18

***

Երկիրը մեծ ակնկալիքներով է պատրաստւում խորհրդարանի արտահերթ ընտրութիւններին, որ ըստ էութեան տրամաբանական է։  Ըստ ներկայիս գործող սահմանադրութեան՝ պատգամաւորների թիւը  105 է։ Մեզ անհանգստացնողը այդ թուի ընտրութեան սկզբունքն է, թէ ի՞նչ տրամաբանութեամբ կամ պահանջով է այն որոշուել։ Մեր քաղաքական գործիչները ասուլիսների ընթացքին յաճախ  իրենց ասելիքները փաստարկելու նպատակով վկայութիւններ են բերում առաջատար երկրներից։ Եթէ նոյն ձեւով մտածենք, ապա կարելի է համեմատել  62 միլիոն բնակիչով եւ 580 պատգամաւորով Ֆրանսան եւ մօտ 3 միլիոն բնակիչ եւ 105 պատգամաւորով Հայաստանը։ Հաւատալով թուաբանութեանը, պարզւում է, որ մեր երկրի պատգամաւորների թիւը չորս անգամ աւելի է Ֆրանսայի համեմատ։

Սիրտս կը պայթի, եթէ հարց չտամ, թէ ինչո՛ւ եւ ի՛նչ անելու համար։ Եթէ կամքիս ուժը բաւարարէր նոյն հաշուարկը կարելի էր անել նախարարների նկատմամբ։ Նրանք անհրաժեշտ պահանջից աւելի են կարծեմ։ Ամէն մարդ ազատ է գնահատել  իւրովի տրամաբանութեամբ ։

25-09-18

 

***

«…Երկու ձեռքս պարզեցի

Եւ իմ անզօր թեւերով

Ազատութիւն գրկեցի…»:

Միք. Նալբանդեան

Դարեր շարունակ՝ տես հազարամեակներ, մարդկութեան  համար ազատութեան գաղափարը եղել է ամենանուիրականը։ Թէժ պայքարներ են մղուել այն ձեռք բերելու եւ առաւելաբար սրբութեամբ պահպանելու համար։ Այդպիսին չէ՞ արցախեան սահմանագծի վիճակը։ Մէկ բան, որ երբեւիցէ պարզօրէն չի բացայայտուել, դա ազատութեան այն ճիշդ (optimal) չափաբաժինն է, որի խախտման պարագային այն դառնում է վտանգաւոր՝ մինչ իսկ վնասակար։

Եթէ գովելի էր Նիկոլի «ՔԱՅԼ»-ին անդամագրուողների բազմաթիւութեան պարագան իր նպատակով եւ արդիւնքով, ապա անհասկանալի ու տգիտութիւն է փողոց ելնել եւ ազատութեան անուան տակ պահանջել Ամուլսարի կամ աջակողմեան ղեկով մեքենաների ներկրման արգելքի չեղարկումը։ Այս երկու դէպքում, ինչ որ շահագրգիռ անձինք կամ աւելի ճիշդ մենաշնորհեալներ են, որ փորձում են անօրինականութին հաստատել երկրում իրենց գրպանները ուռեցնելով։ Ա՛յս է մեր կարծիքը։

02-10-18

 

 

***

Լսել եմ կամ ինչ-որ տեղ կարդացել, թէ անցեալում, երբ նորակառոյց նաւերը իջեցնում էին ջրերի վրայ, բանից պարզւում էր, որ առնէտները նաւաստիներից առաջ արդէն տեղաւորուել էին նաւի նկուղային հարթակներում։ Նիկոլի ղեկավարութեամբ ընթացող մեր պետական «նաւի խցիկներ»-ում արդեօք քանի՞ ծպտուած առնէտնր են տեղաւորուել՝ սպասելով իրենց ժամին։ Յոռետեսութի՞ն է այս, չարախօսութի՞ւն, թէ՞ պարզապէս փորձից եկած վախի զգացում, տեսնելով հրեշտակի թեւերով մեր ղեկավարների դիզած միլիոնաւոր դոլարները եւ շքեղ ապարանքների կառուցումը։

Այսուհանդերձ։

Այսօր վարչապետը ելոյթ ունեցաւ ՄԱԿ-ի ամբիոնից եւ կարելի է ասել, որ հպարտանալու առիթ ընծայեց մեզ, քանզի մեր ներկայացուցիչները հազուագիւտ պարագային է, որ համարձակուել են այդպիսի պատասխանատու առիթներին անգլերէնով արտայայտուել։

27-09-18

 

 

Սպասենք տեսնելու  ներկայ խաժումուժը եւ ստոր աթոռակռիւը ի՞նչ աւարտ  կ՝ունենան․ Բարին մաղթենք․

 

 

Շարունակելի…

LEAVE A REPLY

Please enter your comment!
Please enter your name here