Երիտթուրքերու Պատմութեան Եւ Գաղափարաբանութեան Նուիրուած Միջազգային Գիտաժողով Ֆրեզնոյի Մէջ

0
206

ՖՐԵԶՆՕ.- Քալիֆորնիոյ Նահանգային համալսարանի Ֆրեզնոյի մասնաճիւղին մէջ գործող Հայագիտական ծրագիրին նախաձեռնութեամբ, Հոկտեմբեր 12-13ին տեղի պիտի ունենայ Երիտթուրքերու հիմնադրութեան, գաղափարաբանութեան եւ կառոյցին նուիրուած միջազգային գիտաժողով մը։

Ուրբաթ, Հոկտեմբեր 12ին, երեկոյեան ժամը 7ին, նոյն համալսարանի գործարարական բաժանմունքի «Փիթըրզ» սրահին մէջ (թիւ 191), Հայագիտական ծրագիրը համակարգող փրոֆ. Պարլօ Տէր Մկրտիչեանի բացման խօսքով պիտի սկսի գիտաժողովը, որմէ ետք «Երիտթուրքերու իշխանութիւնը» նիւթով պիտի բանախօսէ դոկտ. Ռէյմըտ Գէորգեանը՝ Փարիզէն։ Ապա, Սիտնի համալսարանէն Հանս Լուքաս Քայզըր պիտի ներկայացնէ «Թալէաթ փաշա եւ Զիա Կոքալփ» նիւթը, մինչ Փրինսթընի համալսարանէն Տողու Քոշքունթունա պիտի բանախօսէ Երիտթուրքերուն մօտ հարենիքի եւ ազգի հասկացողութեան մասին՝ հիմնուած անոնց յուշագրութիւներուն վրայ։

Գիտաժողովը պիտի շարունակուի Շաբաթ, Հոկտեմբեր 13ին, համալսարանի «Քոնի» արուեստի շէնքի թիւ 101 սրահին մէջ, առաւօտեան ժամը 10ին։ Նիստը պիտի համակարգէ հիւրընկալ համալսարանէն դոկտ. Սերճիօ Լա Փորթա, իսկ անոր ընթացքին ուսումնասիրութիւններ պիտի ներկայացնեն Եքթան Թիւրքեըլմազ՝ Պերլինէն (Երիտթուրքերու եւ Դաշնակցութեան միջեւ կապերուն մասին), Տիգրան Խալիկեան՝ Պոսթընի համալսարանէն («Երբ յեղափոխականները կը գտնուին կառավարելու պարտադրանքին տակ» նիւթով) եւ հիւընկալ համալսարանի հիւր դասախօս դոկտ. Ումիթ Քիւրթ («Երիտթիւրքերը Այնթապի մէջ» նիւթով)։

Գիտաժողովին կազմակերպումը ստանձնած են փրոֆ. Պարլօ Տէր Մկրտիչեան եւ դոկտ. Ումիթ Քիւրթ։

Մուտքը ազատ է։ Ինքնաշարժները կարելի է շարել P6 կամ P5 կանգառներուն մէջ։

Յաւելեալ տեղեկութեանց համար, դիմել (559) 278-2669 թիւին կամ այցելել www.fresnostate.edu/armenianstudies կայքէջը:

LEAVE A REPLY

Please enter your comment!
Please enter your name here