Հայաստան Բարելաւած Է Իր Դիրքերը Մրցունակութեան Համաշխարհային Ցանկին Վրայ

0
204

Համաշխարհային տնտեսական համաժողովին (WEF) կողմէ հրապարակուած Համաշխարհային մրցունակութեան (Global Competitiveness Index, Armenia) 2018ի վարկանշային աղիւսակին մէջ Հայաստան աշխարհի 140 երկիրներու շարքին կը զբաղեցնէ 70րդ տեղը, նախորդ տարուան հետ համեմատած՝ իր դիրքը բարելաւելով 2 կէտով:

«ԱրմԷնփրէս»ը կը տեղեկացնէ, թէ մրցունակութեան աղիւսակը 85.6 միաւորով կը գլխաւորէ Միացեալ Նահանգները, որուն կը յաջորդեն Սինկափուրը՝ 83.5 միաւոր եւ Գերմանիան՝ 82.8 միաւոր, 4րդը Զուիցերիան՝ 82.6, 5րդը՝ Ճափոնը՝ 82.5 միաւոր:

Մրցունակութիւնը կը գնահատուի 12 հիմնական չափանիշներու վերլուծութեան հիման վրայ՝ պետութեան կառոյցներու, ենթակառուցուածքներու, մաքրոտնտեսական միջավայրի, առողջապահութեան, կրթութեան ոլորտներու ցուցանիշներու, ապրանքներու շուկայի, աշխատաշուկայի արդիւնաւէտութեան, ֆինանսական շուկայի զարգացման, արհեստագիտութեան պատրաստութեան, շուկայի ծաւալներու: Նշուած 12 ուղղութիւններէն 11ին մէջ Հայաստան յառաջընթաց արձանագրած է:

Նշանակալի յառաջընթաց նկատուած է արհեստագիտութեան պատրաստուածութեան, առողջապահութեան, կրթութեան, ապրանքներու շուկայի, աշխատաշուկայի արդիւնաւէտութեան եւ նորարարական կարողութիւններու մակարդակները բնութագրող ցուցանիշներուն մէջ:

Յետընթաց արձանագրուած է միայն մաքրոտնտեսական վիճակը բնութագրող ցուցանիշներուն մէջ: Անցեալ տարի, Հայաստանի մաքրոտնտեսական միջավայրը գնահատուած էր 74.6 միաւորով, իսկ այս տարի՝ 72.4 միաւորով, եւ սոյն տուեալներուն հիման վրայ վարկանշային աղիւսակին մէջ Հայաստանի տնտեսութիւնը գրաւած 84րդ տեղը:

Հակառակ այն հանգամանքին, որ Մրցունակութեան համաշխարհային ցուցակին մէջ Հայաստան այս տարի բարելաւած է դիրքերը, այդուամենայնիւ տակաւին կը շարունակէ ետ մնալ տարածաշրջանի երկիրներէն. օրինակ՝ Ատրպէյճան աղիւսակին մէջ կը զբաղեցնէ 69րդ տեղը, իսկ Վրաստան՝ 66րդ: Տարածաշրջանի նշուած երկու երկիրները յետընթաց ունեցած են նախորդ տարուան հետ համեմատած:

LEAVE A REPLY

Please enter your comment!
Please enter your name here