Յակոբ Տէր Ղուկասեան Արաբերէնով Կը Բեմադրէ Արա Արծրունիի «Մժեղը»

0
619

Այս շաբաթավերջին, «Մոնօ» թատերասրահի փոքր սրահին մէջ ընթացք առաւ Յակոբ Տէր Ղուկասեանի նոր բեմադրութիւնը` Արա Արծրունիի «Մժեղը»` արաբերէն լեզուով: «Քոլեքթիֆ տը լաքթ»-ի դերասաններէն Թոնի Ֆարահ եւ Սառա Ապտօ, անոնց միանալով Ժոզեֆ Խուրի եւ Անժելա Խալիլ, մէկ ժամուան ընթացքին մեզի հրամցուցին չորս կերպարներ, որոնց զրոյցը կը դառնայ մժեղ մը սատկեցուցած ըլլալնուն շուրջ:

Թատերախաղը կը սկսի բեմադրիչին ազդանշանով, եւ կիսամութ սրահ մուտք կը գործեն երեք նոյնանման զգեստներով ու շպարով պարոններ: Ի դէպ, Սարգիս Ասատուրեանի ստեղծագործութեամբ մէջտեղ եկած զգեստները բաւարար են լեցնելու բեմայարդարութենէ մերկ սրահը: Թատերախաղը կ՛ունենայ իր անկիւնադարձը, երբ չորրորդ պարոնը մուտք կը գործէ բեմ` իր սպիտակ հագուստով: Հոս եւս զրոյցը կը դառնայ մժեղ մը սատկեցուցած ըլլալնուն շուրջ, որմէ ետք կը վերածուի ինքնութիւն չունեցող չորրորդ կերպարին հեղինակութիւն տալուն: Հոս է, որ չորրորդ կերպարը` ստանալով իրեն շնորհուած ուժը, կը կոտրէ իր նախկին երկչոտ բնաւորութիւնը, եւ, մանաւանդ հանելով իր սպիտակ հագուստները եւ հագնելով միւսներուն հագուստէն, կը դառնայ անոնցմէ մէկը: Ինքնութիւնն ու հեղինակութիւնը կը վերածուին մժեղ մը սատկեցուցած ըլլալու կիզակէտները: Փաստօրէն, մժեղը սատկեցնելու միջոցով հեղինակութեան ուժը մէկ պարոնէն միւսը կը դառնայ ու բեմի փոքրիկ տարածքին մէջ կ՛արտացոլացնէ մեր ընկերային ու քաղաքական կեանքի մանրանկարը:

Դերասաններուն մասնագիտական խաղարկութիւնը մէկ կողմէ, լոյսի սարքաւորումը եւ երաժշտութիւնը (Հրայր Գալէմքերեանի) միւս կողմէ, ինչպէս նաեւ Արծրունիի անհեթեթի թատրերգութիւնն ու Տէր Ղուկասեանի բեմադրութիւնը հանդիսատեսը արուեստի տեսակէտէն կը յագեցնեն:

Գործին յաջողութեան համար իրենց դերակատարութիւնը ունեցած են նաեւ Փաթիլ Գուլաճեան, Մհեր Ծատուրեան, Սէրուժ Յովսէփեան, Բալիկ Ծատուրեան, Ռոստոմ Գույումճեան, Էթիեն Սիւքիւնեան, Մոհամետ Ֆայիզ Թարապիշի, Ժալալ Շաար եւ Ֆարիտ Շաուքի:

LEAVE A REPLY

Please enter your comment!
Please enter your name here