Ռուսիա, Թուրքիա, Գերմանիա Եւ Ֆրանսա Սուրիոյ Տագնապին Գծով Պոլսոյ Մէջ Վեհաժողով Պիտի Գումարեն

0
277

ԵՐԵՒԱՆ, «Էրմենիհապեր».-  27 Հոկտեմբերին, Պոլսոյ մէջ, Թուրքիոյ, Ռուսիոյ եւ Ֆրանսայի նախագահներուն եւ Գերմանիոյ վարչապետին մասնակցութեամբ տեղի պիտի ունենայ Սուրիոյ հարցով գերաստիճան մը, Հոկտեմբեր 19ին հաղորդեց Թուրքիոյ նախագահի մամլոյ խօսնակը: Ըստ Անգարայի՝ քառակողմ ժողովին ընթացքին կը նախատեսուի քննարկել սուրիական հակամարտութեան վերաբերող զանազան հարցեր, ներառեալ՝ ներկայ իրավիճակը, Իտլիպի շուրջ համաձայնութիւնը եւ քաղաքական գործընթացները, ինչպէս նաեւ յստակացնել հակամարտութեան վերջնական լուծման համար առնուելիք քայլերը:

Միւս կողմէ, «Ազատութիւն» ձայնասփիւռի կայանը կը հաղորդէ, որ Սուրիոյ հարցով ՄԱԿի յատուկ պատուիրակ Սթեֆան տէ Միսթուրա Նոյեմբերին պիտի լքէ իր պաշտօնը, «բացառապէս անձնական պատճառներով»: Այս յայտարարութիւնը կատարելէ ետք, պատուիրակը աւելցուց, որ հակառակ սուրիական բանակի յառաջխաղացքին, կարելի չէ տեւական խաղաղութիւն ապահովել, եթէ Սուրիոյ նախագահ Պաշշար Ասատ չընդունի ՄԱԿի կողմէ առաջարկուող խաղաղութեան պայմանները:

Իր կարգին, Ռուսիոյ նախագահ Վլատիմիր Փութին յայտնեց, որ Ռուսիա Սուրիոյ հողերուն «մօտաւորապէս 95 առ հարիւրը ազատագրեց եւ պետութեան քայքայումը չարտօնեց», աւելցնելով, որ Թուրքիա ցարդ ամբողջութեամբ չէ գործադրած Իտլիպի մէջ ապազինեալ գօտի ստեղծելու առաքելութիւնը, «սակայն կը նկատենք, որ անիկա տէր կը կանգնի իր յանձնառութիւններուն»:

LEAVE A REPLY

Please enter your comment!
Please enter your name here