Փաշինեան Հանդիպում Ունեցաւ Լիբանանահայ Համայնքի Ներկայացուցիչներուն Հետ. «Իւրաքանչիւրս Պէտք Է Ջանք Թափենք Համահայկական Օրակարգի Իրագործման Համար»

0
244

Հայաստանի վարչապետի պաշտօնակատար Նիկոլ Փաշինեան 20 հոկտեմբերին Լիբանանի մէջ Հայաստանի Հանրապետութեան դեսպանութեան մէջ հանդիպում ունեցաւ Լիբանանի հայ համայնքի ներկայացուցիչներուն հետ:

Ինչպէս «Արմէնփրես»-ին տեղեկացուցին Հայաստանի Հանրապետութեան կառավարութեան տեղեկատուութեան եւ հասարակութեան հետ կապերու վարչութենէն, ողջունելով հանդիպման մասնակիցները` վարչապետի պաշտօնակատար Նիկոլ Փաշինեան նշեց. «Ինծի համար մեծ պատիւ է այսօր այստեղ գտնուիլ եւ ձեզի հետ նման շփման կարելիութիւն ունենալ: Նախ եւ առաջ կը ցանկամ շնորհակալութիւն յայտնել ձեզ, որովհետեւ այս ամբողջ ընթացքին մենք զգացած ենք ձեր ջերմութիւնը եւ աջակցութիւնը: Ատիկա մեզի համար շատ կարեւոր է եւ մեծ ուժ տուած է, որպէսզի կարենանք ամուր մնալ այն պահերուն, երբ կը թուէր, թէ սասանիլը անխուսափելի է: Մենք մեզի հաշիւ տուած ենք այս ամբողջ ընթացքին եւ շարունակենք նոյն կերպ ընկալել իրավիճակը, որ այն փոփոխութիւնները, որ մենք ստանձնեցինք եւ այն կարգավիճակը, որ այսօր ունինք, մեծ պատասխանատուութիւն եւ պատիւ է մեզի համար ո՛չ միայն Հայաստանի ժողովուրդի, այլեւ ամբողջ հայութեան առջեւ: Կը ցանկամ հաւաստիացնել ձեզի, որ այդ պատասխանատուութիւնը մենք լիարժէք պատրաստ ենք կրելու, եւ ատիկա այսօր եւս մէկ անգամ հաստատուեցաւ. իսկապէս շատ պատուաբեր է աջակցութեան խօսքեր լսել մեր աւանդական կուսակցութիւններէն, կազմակերպութիւններէն, մեր բոլոր հայրենակիցներէն: Կ՛ուզեմ երկու բառով ըսել, թէ ի՞նչ կ՛ուզենք ընել, եւ որո՞նք են այն առանցքային փոփոխութիւնները, որ տեղի պիտի ունենան կամ տեղի կ՛ունենան Հայաստանի մէջ:

Առաջինը եւ ամէնէն կարեւորը ժողովրդավարութիւնն է, որ մեզի համար ուղղակի տեսական դրոյթ չէ. շատ կարեւոր է ժողովրդավարութեան անհատական ընկալումը: Կարելի է շատ քննարկել, թէ ի՛նչն էր պատճառը, որ, այնուամենայնիւ, Հայաստանի քաղաքացիները ոտքի կանգնեցան եւ որոշեցին իրականացնել այդ փոփոխութիւնները, կարելի է բերել տնտեսական, ընկերային, իրաւական պատճառներ:

Բայց կը կարծեմ, որ Հայաստանի ժողովուրդին եւ քաղաքացիներուն մեծագոյն պահանջը յարգուած ըլլալն էր սեփական երկրին մէջ եւ արհամարհուած չըլլալը: Ասիկա ամէնէն կարեւորն էր, որ Հայաստանի քաղաքացիները, Հայաստանի մէջ ապրող մարդիկ, Հայաստանի ժողովուրդը կը պահանջեն իշխանութիւններէն եւ պիտի պահանջեն որեւէ իշխանութենէ, որովհետեւ յատկապէս մենք` հայերս, ինքնասիրութեան առանձնայատուկ զգացում ունինք, եւ իշխանութենէն ժողովուրդի ակնկալած յարգանքը ամէնէն կարեւոր գործօնն է, որ բերաւ փոփոխութիւններ:

Մեր ամէնէն կարեւոր առաքելութիւնը կը նկատեմ, որ Հայաստանի Հանրապետութեան մէջ ժողովուրդը ինքզինք յարգուած զգայ, եւ ընդհանրապէս հայ ժողովուրդը վստահի ինքն իրեն, իր ուժերուն, ինքնավստահութիւն ձեռք բերէ, որ մեզի համար չկան անլուծելի խնդիրներ: Պարզապէս պէտք է կարենանք համախմբել մեր համազգային ներուժը, ձեւակերպել եւ յստակացնել մեր համազգային օրակարգը եւ իւրաքանչիւրս մեր տեղը, մեր չափով մեր ջանքը բերենք այդ օրակարգի իրականացման համար: Այդ առումով շատ կարեւոր կը նկատեմ ժողովրդավարութեան հաստատումը Հայաստանի մէջ:

Նախապէս իբրեւ ընդդիմադիր քաղաքական գործիչ քանի մը անգամ ըսած եմ, հիմա կը ցանկամ Հայաստանի Հանրապետութեան վարչապետի կարգավիճակով կրկնել. մենք հիմա ունինք ժողովուրդի վստահութիւնը, կը ներկայացնենք Հայաստանի Հանրապետութիւնը` ըլլալով Հայաստանի Հանրապետութեան իշխանութիւն եւ երբ հասնինք որոշակի ազատութիւններու, մարդոց իրաւունքներու պաշտպանութեան եւ պահպանութեան, անկախ դատական համակարգ ստեղծենք, տնտեսական, քաղաքական յաջողութիւններու, այս պարագային ես աւարտած չեմ նկատեր յեղափոխութեան առաքելութիւնը եւ մեր առաքելութիւնը: Ինծի համար, իմ եւ մեր քաղաքական խումբին ընկալումով մեր առաքելութիւնը իրականացած կրնանք նկատել, որ երբ ազատ, արդար, ժողովրդավարական ընտրութիւններով հասնինք իշխանութեան, կամ հասած ենք իշխանութեան ժողովուրդի ազատ կամարտայայտութեամբ, այնպէս ալ ժողովուրդի ազատ կամարտայայտութեամբ կարենանք հեռանալ իշխանութենէն: Ասիկա շատ կարեւոր դրոյթ է, որովհետեւ, ի վերջոյ, կարեւոր է, որ Հայաստանի ժողովուրդը իմանայ եւ յստակօրէն գիտակցի, որ ոչ թէ իշխանութիւնը կ՛որոշէ, թէ ինչպիսի՛ ընտրութիւն կատարէ ինքը, այլ ժողովուրդը կ՛որոշէ, թէ ինչպիսի՛ իշխանութիւն պէտք է ձեւաւորուի Հայաստանի մէջ:

Այս առումով մենք պէտք է արձանագրենք, որ Հայաստանի մէջ ընտրական հիմնարկի վերականգնումը մեր ամէնէն կարեւոր առաքելութիւնն է, եւ Հայաստանի Հանրապետութեան իւրաքանչիւր քաղաքացի պէտք է վստահ ըլլայ, որ իր ձայնով կրնայ որոշում կայացնել իշխանութեան կերպարի շրջանակի եւ անհատներուն վերաբերեալ: Մնացածը կը բխին ասկէ եւ կը ծառայեն ասոր:

Դուք տեղեակ էք, որ երկար տարիներ Հայաստանի մէջ հաստատուած էին տնտեսական մենաշնորհներ: Ես պատիւ ունիմ այսօր ըսելու, որ Հայաստանի մէջ այլեւս տնտեսական մենաշնորհներ չկան, Հայաստանի մէջ երկար տարիներ կը գործէր յստակ համակարգուած փտածութեան գործընթաց, պատիւ ունիմ ըսելու, որ Հայաստանի մէջ այսօր փտածութիւն չկայ: Ի հարկէ, դեռ կան բազմաթիւ պաշտօնեաներ, որոնք 20 տարի եւ աւելի աշխատած են այդ նոյն տրամաբանութեամբ եւ հիմա սողանքներ կը փնտռեն այդ գործընթացները կրկին վերականգնելու համար, բայց մենք անոնց այդ կարելիութիւնը, ի հարկէ, պիտի չտանք, եւ ասիկա սկզբունքային հարց է մեզի համար:

Ինծի համար ամէնէն կարեւոր սկզբունքը հետեւեալն է. պէտք է բացառուի իշխանութեան կիրարկումը իբրեւ սեփականութեան, հարստութեան կամ նիւթական միջոցներու ձեռքբերման գործընթաց: Ես այս հարցով շատ սկզբունքային եմ եւ սկզբունքային պիտի ըլլամ: Իմ պատկերացումովս` մեր իշխանութեան մէջ տեղ պէտք չէ ունենան մարդիկ, որոնք իշխանութիւնը կը կիրարկեն իբրեւ սեփականութիւն ձեռք բերելու միջոց: Ընդհանրապէս ով որ կ՛ուզէ սեփականութիւն ձեռք բերել, ունենալ, ատիկա օրինական եւ հասկնալի ձգտում է, եթէ մարդը զբաղած չէ իշխանական գործունէութեամբ կամ ընդհանրապէս քաղաքականութեամբ, որովհետեւ քաղաքականութիւնը պէտք է դադրի ըլլալ սեփականութիւնը պահպանելու միջոց, գործարար դառնալու կամ գործարարութիւնը պահպանելու միջոց:

Ցաւօք, չեմ կրնար պնդել, որ այսօր այս ուղերձը շատ յստակ ընկալուած է Հայաստանի Հանրապետութեան մէջ բոլորին կողմէ, եւ չեմ կրնար բացառել, որ այս միտումը տակաւին կրնայ շարունակուիլ, եւ նոյնիսկ ըլլան նոր դրսեւորումներ, բայց կրնամ վստահաբար ըսել, որ մենք հետեւողականօրէն ատոր դէմ պիտի պայքարինք, եւ այս երեւոյթը պէտք է շատ յստակ Հայաստանի իրականութենէն բացառուի: Այստեղ կան խնդիրներ սահմաններու, մեթոտներու մասին, որպէսզի ատոնք ոչ թէ յայտարարութիւններով լուծուին, այլ ըլլան հաստատութենական գործընթացներ, որոնք հանրութեան թոյլ կու տան այդ ամէնը վերահսկել եւ իշխանութիւնը մշտական վերահսկողութեան տակ պահել: Յաջորդը թափանցիկութեան սկզբունքն է, որ իշխանութիւնը պէտք է կարենայ աշխատիլ թափանցիկ եւ հաշուետու ըլլալ ժողովուրդին առջեւ:

Մեզի համար, ի վերջոյ, ամէնէն կարեւորը մեր պետականութեան ուժեղացումը եւ հզօրացումն է` յանուն մեր համազգային նպատակներու իրագործման: Պէտք է արձանագրենք, որ պետականութեան ուժեղացումը կրնայ յենուած ըլլալ ժողովուրդի ուժեղացման վրայ, որովհետեւ շատ թիւր տեսակէտներ կան, թէ կարելի է ունենալ ոչ այդքան ուժեղ ժողովուրդ եւ ունենալ ուժեղ պետականութիւն: Այդպիսի բան չի կրնար ըլլալ: Իւրաքանչիւր քաղաքացի պէտք է Հայաստանի Հանրապետութեան մէջ ինքզինք զգայ իրաւատէր, սեփականատէր, անձեռնմխելի իր բոլոր օրինական շահերու մէջ, եւ վստահաբար կրնամ ըսել, որ մենք շատ յստակ քայլերով կ՛երթանք այդ ուղղութեամբ: Ատիկա չի նշանակեր, որ այդ ճանապարհին վրայ չկան եւ պիտի չըլլան դժուարութիւններ, բայց համոզուած եմ, որ մեզի համար գոյութիւն չունին անյաղթահարելի դժուարութիւններ: Մեզի ըսելով` նկատի ունիմ մեր ժողովուրդը, որովհետեւ մեր ժողովուրդը հազարամեակներու մէջէն անցած է, Ցեղասպանութեան մէջէն անցած է, բազում արհաւիրքներու մէջէն անցած է, եւ ահա մենք կանգնած ենք 21-րդ դարուն, մենք ունինք պետականութիւն, որուն գոյութեան 27-րդ տարուան մէջ մենք կրցանք իրականացնել բան մը, որ աննախադէպ է ընդհանրապէս մարդկութեան պատմութեան համար: Մենք կրցանք ատիկա ընել, բան մը, որ Հայաստանի ժողովուրդի եւ ընդհանրապէս հայութեան 99 տոկոսը կը նկատէր անկարելի, ոչ թէ չէր ցանկար, այլ անկարելի կը նկատէր: Մէկ մասը մտահոգութիւն ունէր, որ այդ ճանապարհը կրնայ բերել ցնցումներու, եւ մենք անխուսափելի կորուստներ կ՛ունենանք, բայց քայլ առ քայլ, րոպէ առ րոպէ մենք զգացինք մեր բոլոր հայրենակիցներու աջակցութիւնը, եւ ժողովրդական, ոչ բռնի, թաւշեայ յեղափոխութիւնը տեղի ունեցաւ այն ժամանակ, երբ հայութեան 99, եթէ ոչ 100 տոկոսը արձանագրեց իր աջակցութիւնը տեղի ունեցող գործընթացին: Սա իսկապէս համաժողովրդական յեղափոխութիւն է` համաժողովրդական ո՛չ միայն հայաստանեան, այլեւ հայութեան տարողութեամբ:

Ես կ՛ուզեմ ձեզ շնորհաւորել բոլորիս իրականացուցած ոչ բռնի, թաւշեայ, ժողովրդական յեղափոխութեան առիթով, որովհետեւ յոյս ունիմ, որ ձեզմէ իւրաքանչիւրը ինքզինք յաղթանակած կը զգայ այդ յեղափոխութեան բերումով, եւ ես ձեզ կը շնորհաւորեմ ձեր յաղթանակին առիթով:

Շնորհակալութիւն»:

Այնուհետեւ Նիկոլ Փաշինեան պատասխանեց լիբանանահայ համայնքի ներկայացուցիչներու շարք մը հարցումներուն, որոնք կը վերաբերէին Հայաստանի զարգացման, Հայաստան-սփիւռք կապերու սերտացման, ոլորտային բարեփոխումներուն, Հայաստանի Հանրապետութեան տնտեսական զարգացման առաջնահերթութիւններուն, հայրենադարձութեան, պետութիւն-եկեղեցի համագործակցութեան եւ այլն:

Հայաստան-սփիւռք յարաբերութիւններու առնչութեամբ Նիկոլ Փաշինեան նշեց. «Մեզի համար կարեւոր է, որ, ի վերջոյ, այս փուլին այն բոլոր թնճուկները, որ եղած են Հայաստան-սփիւռք յարաբերութիւններուն մէջ, լուծուին: Որեւէ կասկած չկայ, որ հայութիւնը պէտք է մասնակցութիւն ունենայ Հայաստանի մէջ պետականաշինութեան գործին, բայց մենք պէտք է համախմբման աւելի բարձր` հաստատութենական մակարդակով ատիկա իրականացնենք: Սփիւռքը եւ Հայաստանը այսօր միասնական են յեղափոխութեան բերումով ձեւաւորուած այս դրական վերաբերմունքին առումով, որ պէտք է բիւրեղացնենք եւ որոշակի արդիւնքներ արձանագրենք»: Վարչապետի պաշտօնակատարը անդրադարձաւ նաեւ «Հայաստան» համահայկական հիմնադրամի գործունէութեան` կոչ ուղղելով վստահութեամբ վերաբերելու կառոյցի աշխատանքներուն եւ օժանդակելու հիմնադրամին գործունէութեան թափանցիկութեան, միջոցները հաստատութենական ծախսելու արդիւնաւէտութեան բարձրացման ուղղուած աշխատանքներուն մէջ: «Շատ կարեւոր է գումարները ծախսելու գործընթացը, որովհետեւ թափանցիկութիւնը ամէնէն կարեւորն է: Շատ կարեւոր է վստահութեան զգացումը, եւ յոյս ունիմ, որ Հայաստան-սփիւռք յարաբերութիւնները կը հիմնուին նախ եւ առաջ վստահութեան վրայ», ընդգծեց ան:

Ինչ կը վերաբերի Հայաստանի մէջ ժողովրդավարութեան զարգացման հեռանկարներուն, Հայաստանի Հանրապետութեան վարչապետի պաշտօնակատարը նշեց. «Ժողովրդավարութիւնը Հայաստանի Հանրապետութեան մէջ այլընտրանք չունի, եւ ես կը բացառեմ, որ Հայաստանի Հանրապետութեան մէջ մեր կառավարութեան օրով որեւէ ընտրութիւն կեղծուի: Հայաստանի մէջ մամուլը երբեք այնքան ազատ չէ եղած, որքան այսօր, Հայաստանի մէջ տնտեսական եւ քաղաքական գործունէութիւնը, արտայայտուելու կարելիութիւնը երբեք այնքան ազատ չեն եղած, որքան այսօր: Հայաստանի կառավարութիւնը այսօր ունի ժողովուրդի շատ մեծ աջակցութիւնը, որ աննախադէպ է երրորդ հանրապետութեան պատմութեան մէջ, եւ եթէ կայ գերակայութիւն, ատիկա ժողովուրդի գերակայութիւն է», ըսաւ Ն. Փաշինեան` համոզմունք յայտնելով, որ Հայաստանը պիտի շարունակէ վստահօրէն յառաջ ընթանալ ժողովրդավարական ճամբով:

Նիկոլ Փաշինեան ներկայացուց Հայաստանի տնտեսական զարգացման տեսլականը` նշելով, որ Հայաստանի Հանրապետութեան տնտեսութիւնը հիմնուած է հանքարդիւնաբերութեան, գիւղատնտեսութեան եւ խաղադրոյքներու արդիւնաբերութեան վրայ. այդ կառուցուածքը պէտք է փոխել, եւ կառավարութիւնը նպատակադրուած է Հայաստանը գիւղատնտեսական երկրէն դարձնել արհեստագիտական երկիր: «Կ՛ակնկալենք ներդրումներ տեղեկատուական եւ բարձր արհեստագիտութիւններու բնագաւառին մէջ: Բայց ընդհանուր առմամբ Հայաստանը պէտք է ըլլայ արտադրական երկիր. մեծ հեռանկարներ ունին ադամանդագործութիւնը, ոսկերչութիւնը, թեթեւ արդիւնաբերութիւնը, զբօսաշրջութիւնը, արհեստագիտական գիւղատնտեսութիւնը եւ այս ամէնը կը տեղաւորուի կանաչ Հայաստանի գաղափարին ներքեւ», նշեց վարչապետի պաշտօնակատարը` կարեւոր նկատելով Հայաստանի Հանրապետութեան տնտեսութեան կառուցուածքային բարեփոխման եւ զարգացման գործին մէջ սփիւռքահայ մասնագէտներու ներգրաւումը: Ան նաեւ մանրամասնութիւններ ներկայացուց ներդրումային միջավայրի բարելաւման եւ հարկային օրէնսդրութեան բարեփոխումներուն վերաբերեալ:

Հանդիպումին ընթացքին հարցում ուղղուեցաւ նաեւ համահայկական օրակարգի հարցերու, որոնց մէջ Արցախի տագնապի լուծման վերաբերեալ: Նիկոլ Փաշինեան նշեց, որ համազգային օրակարգի հարցերը պէտք է քննարկել միասնական ձեւաչափով, որուն մէջ ներգրաւուած կ՛ըլլան հայութեան տարբեր շերտերը: Անդրադառնալով Լեռնային Ղարաբաղի տագնապին` վարչապետի պաշտօնակատարը ըսաւ. «Շատ յաճախ միջազգային հանրութեան ներկայացուցիչները կամ տարբեր բանակցութիւններու ժամանակ հարց կը հնչեցնեն ինծի` իսկ Հայաստանը պատրա՞ստ է փոխզիջումներու: Այդ հարցին սովորաբար ես հետեւեալ պատասխանը կու տամ` իսկ Ազրպէյճանը պատրա՞ստ է փոխզիջումներու: Ես չեմ նկատեր, թէ Հայաստանը պէտք է առաջինը այս հարցին պատասխանէ, եւ, չես գիտեր ինչու, իմ` Հայաստանի վարչապետի պաշտօնին ընտրուելէս ետք կը զգամ, որ այդպիսի տրամաբանութիւն մը կայ, որ չեմ գիտեր ո՛վ եւ ո՛ւր որոշած է, որ այդ հարցին առաջինը պէտք է պատասխանէ Հայաստանը: Հայաստանը չի պատրաստուիր այդ հարցին առաջինը պատասխանել: Ես ըսած եմ, որ մենք որեւէ իրավիճակի մէջ պիտի ըլլանք համարժէք, եւ Հայաստանը, Հայաստանի Հանրապետութեան կառավարութիւնը համարժէքութեան զգացումը երբեք պիտի չկորսնցնէ:

Ինչ կը վերաբերի հարցի լուծման շրջանակին, ես դժուար կը պատկերացնեմ հարցի լուծումը առանց Արցախի կարգավիճակի ճշգրտման եւ յստակացման: Ասիկա իրողութիւն մըն է, որ մենք մեր բոլոր ելոյթներուն մէջ կ՛ընդգծենք, որ Արցախի անվտանգութիւնը եւ կարգավիճակը ունին անկիւնաքարային նշանակութիւն լուծման համար», ըսաւ Նիկոլ Փաշինեանը:

Վարչապետի պաշտօնակատարը, խօսելով Արցախի հարցի լուծման մեթոտաբանութեան մասին նշեց, որ մեր իրականութեան մէջ կայ տարօրինակ ընկալում, որ երբեմն կը հնչեցուի մամուլին մէջ եւ քաղաքական գործիչներու յայտարարութիւններուն մէջ. «Երբեմն այնպիսի երանգ կը մտնէ, որ տպաւորութիւն կը ստեղծուի, որ ոեւէ մէկը կը մտածէ, թէ Հայաստանի մէջ կրնայ ըլլալ կառավարութիւն, որ որոշէ, որ ինքը թաքուն Արցախի հարցը պիտի լուծէ: Վերջին քսան տարուան ընթացքին անընդհատ ատիկա կը շրջանառուի: Որեւէ իշխանութիւն, թէկուզ ամէնէն վատ իշխանութիւնը վատ մտադրութիւններ ունեցող ինչպէ՞ս թաքուն պիտի լուծէ Ղարաբաղի հարցը: Ես ընդհանրապէս կ՛առաջարկեմ, որ մենք հրաժարինք այդ բանավէճէն: Անգամ մը ըսած եմ եւ ընդ որում, այդ կ՛ըսեմ նաեւ բանակցութիւններու ընթացքին, որ եթէ կ՛ըլլայ հարցի լուծման որեւէ տարբերակ, որ ես ինքզինքս կը կարենամ համոզել, որ այդ լաւ տարբերակ է, ես կը ներկայացնեմ անիկա մեր ժողովուրդին Հայաստանի եւ սփիւռքի մէջ, եւ ժողովուրդը կ՛որոշէ` կ՛ուզէ՞ այդ տարբերակը, թէ՞ ոչ: Ես կ՛առաջարկեմ ընդհանրապէս դաւադրութեան տեսութիւնը Ղարաբաղի հարցի լուծման շրջագիծէն հանել, բացառել: Այդպիսի բան չի կրնար ըլլալ ի բնէ, որովհետեւ կարելի չէ թաքուն լուծել այդ հարցը:

Եւ յաջորդը, ես կը խօսիմ Հայաստանի եւ սփիւռքի մասին, բայց ամէնէն կարեւոր, վճռական գործօնը Արցախի Հանրապետութեան իշխանութեան եւ Արցախի ժողովուրդի դիրքորոշումն է այս հարցին վերաբերեալ: Եթէ նոյնիսկ Հայաստանը եւ սփիւռքը ըսեն, որ շատ լաւ տարբերակ է, իսկ Արցախի ժողովուրդը ըսէ, որ վատ տարբերակ է, ուրեմն ատիկա վատ տարբերակ է: Արցախի ժողովուրդը այդ խնդիրին թիւ մէկ սեփականատէրն է, եւ Արցախի ժողովուրդի եւ Արցախի իշխանութեան կարծիքը վճռական է հարցի լուծման տեսակէտէն: Ատիկա չի կրնար նաեւ նշանակել, թէ մենք որեւէ կերպով կը մերժենք բանակցութիւնները, բայց կ՛ըսենք, որ սա համազգային խնդիր է, որ պէտք է լուծենք բոլորս միասին: Բացառուած է, որ առանձին վերցրած իշխանութիւն, նոյնիսկ մեծագոյն վստահութիւն ունեցող իշխանութիւնը կարենայ այդ խնդիրը լուծել զարտուղի ճամբով: Ո՛ր պահուն որ փորձէ, ամբողջ վստահութիւնը մէկ րոպէի մէջ կը կորսնցնէ: Ասիկա ակնյայտ է, եւ այստեղ պէտք է շատ յստակ ըլլանք», եզրափակեց Նիկոլ Փաշինեան:

LEAVE A REPLY

Please enter your comment!
Please enter your name here