Նիկոլ Փաշինեան Արցախի Հակամարտութեան Լուծման Հարցով Վճռական Կը Համարէ Արցախի Եւ Հայաստանի Ժողովուրդին Դիրքորոշումը

0
305

ԵՐԵՒԱն.- Հայաստանի մէջ չի կրնար գոյութիւն ունենալ այնպիսի իշխանութիւն, որ առանց ժողովուրդին կարծիքը նկատի առնելու կրնայ լուծել Լեռնային Ղարաբաղի հակամարտութեան հարցը: Ըստ «Արմէնփրէս»ի՝ 24 Հոկտեմբերի Ազգային ժողովի հերթական նիստին ընթացքին, որուն օրակարգին վրայ վարչապետի ընտրութեան հարցն էր, այս մասին խօսեցաւ վարչապետի թեկնածու Նիկոլ Փաշինեան՝ պատասխանելով պատգամաւոր Շիրակ Թորոսեանի հարցումին:

«Հայաստանի մէջ ոչ մէկ իշխանութիւն, նոյնիսկ ամենաբռնապետական իշխանութիւնը, չի կրնար Ղարաբաղի հարցը լուծել առանց ժողովուրդի կարծիքը նկատի առնելու: Ժողովուրդի կարծիքը այն վճռական գործօնն է, որ պէտք է որոշէ՝ ձեռնտո՞ւ է Լեռնային Ղարաբաղի հիմնահարցի լուծման այս կամ այն տարբերակը, թէ ոչ: Նոյնիսկ բանակցային սեղանի շուրջ քննարկուածը էական չէ: Քսան տարի քննարկուած է, ի՞նչ եղած է: Ղարաբաղի հարցի թաքուն լուծում չի կրնար ըլլալ», վստահեցուց Փաշինեան:

Ան շեշտեց, որ Արցախի ժողովուրդին եւ իշխանութիւններուն դիրքորոշումը վճռական նշանակութիւն ունի, եւ ասիկա քմահաճոյքի հարց չէ: Ըստ անոր՝ հակամարտութիւնը չի լուծուիր, եթէ լուծման որեւէ տարբերակ չ՛ընդունուիր Արցախի եւ Հայաստանի ժողովուրդին կողմէ: Փաշինեան նշեց, որ հայկական կողմի տեսակէտը այն է, որ առանց Արցախի կարգավիճակի ճշդումին անկարելի է պատկերացնել հարցին լուծումը:

«Եթէ բանակցային գործընթացին մէջ ձեւաւորուի տարբերակ, զոր կը համարենք, որ կ՛արժէ ներկայացնել ժողովրդի քննարկման, բնականաբար առաջինը ես այդ մէկը պիտի կատարեմ», ըսաւ Փաշինեան: Ան բացառեց Լեռնային Ղարաբաղի հիմնահարցի «թաքուն» լուծումը: Ըստ անոր՝ երբ տակաւին Արցախի իշխանութիւնները ներգրաւուած չեն բուն գործընթացին մէջ, կը նշանակէ, որ մենք չենք մօտեցած հարցի կարգաւորման:

«Ես չեմ ըսած, որ մենք չենք բանակցիր, մինչեւ Արցախի իշխանութիւնը ներգրաւուած չըլլայ: Ես ըսած եմ, որ ես լիազօրուած եմ բանակցելու Հայաստանի կողմէ, սակայն լիազօրուած չեմ բանակցելու Արցախի կողմէ, որովհետեւ Արցախի ժողովուրդը չի մասնակցիր Հայաստանի մէջ իշխանութեան ձեւաւորման: Բայց այդ չի նշանակեր, որ ես կ՛ըսեմ, որ պէտք չէ բանակցիլ», ըսաւ Փաշինեան:

LEAVE A REPLY

Please enter your comment!
Please enter your name here