Հայ-Ամերիկեան Յարաբերութիւնները Մեզի Համար Ռազմավարական Նշանակութիւն Ունին. Ճոն Պոլթըն

0
290

Միացեալ Նահանգներու նախագահի ազգային անվտանգութեան հարցերու խորհրդական Ճոն Պոլթըն 1997էն ի վեր, անվտանգութեան հարցերու առաջին խորհրդականն է, որ կ՛այցելէ Հայաստան: Այս մասին Հինգշաբթի օր, Հայաստանի մէջ Միացեալ Նահանգներու դեսպանատան մէջ լրագրողներու հետ հանդիպման ընթացքին նշեց անձամբ ինք՝ Ճոն Պոլթըն:

Ան յայտնեց, որ նոյն օրը հանդիպումներ ունեցած է Հայաստանի վարչապետի պաշտօնակատար Նիկոլ Փաշինեանի հետ, մինչ այդ նաեւ հանդիպումներ ունեցած էր Հայաստանի պաշտպանութեան նախարարի պաշտօնակատարին, արտաքին գործոց նախարարի պաշտօնակատարին ու ազգային անվտանգութեան քարտուղարին հետ:

«Հայաստանի վարչապետ Նիկոլ Փաշինեանի հետ ունեցանք շուրջ մէկ ժամ քսան վարկեան տեւողութեամբ հանդիպում մը, որուն ընթացքին նշեցի, որ հայ-ամերիկեան յարաբերութիւնները Միացեալ Նահանգներու համար առաջնահերթ կարեւորութիւն կը ներկայացնեն. անոնք մեզի համար ռազմավարական նշանակութիւն ունին: Մենք պատրաստ ենք մեր աջակցութիւնը տրամադրելու Լեռնային Ղարաբաղի հարցի կարգաւորման գործին մէջ՝ իբրեւ ԵԱՀԿ Մինսկի խումբի համանախագահ, որովհետեւ այդ կարգաւորումը կը բխի ոչ միայն Հայաստանի եւ Ատրպէյճանի շահերէն, այլ նաեւ Միացեալ Նահանգներու շահերէն», ներկայացուց Պոլթըն:

«Հարցի լուծումը բարդ է: Եթէ անիկա դիւրին ըլլար, արդէն շատոնց լուծուած կ՛ըլլար: Ես իմ այցելութեամբ չեմ եկած ազդարարելու ամերիկեան քաղաքականութեան փոփոխութիւն, կամ նոր լուծումներ առաջարկելու այս հարցով: Կողմերը պէտք է աշխատին իրարու հետ , եւ վերջապէս, անոնք պէտք է կարենան գտնել լուծումը», ըստ «Արմէնփրէս»ի՝ նշեց Պոլթըն, մէջբերելով այլ երկարատեւ հակամարտութեան վերաբերող իր նախկին վերադասներէն՝ արտաքին գործոց նախարար Ճիմ Պէյքըրի խօսքերը. «Ոչ ոք աւելի շատ խաղաղութիւն կ՛ուզէ, քան իրենք՝ կողմերը»:

Ան յայտնեց նաեւ, որ նոյն օրը իր հանդիպումներուն ընթացքին անդրադարձ եղած է նաեւ Ռուսիոյ մէջ Երկուշաբթի եւ Երեքշաբթի օրերուն ունեցած քննարկումներուն, Իրանի նկատմամբ պատժամիջոցներուն, ընդհանուր տարածաշրջանային հարցերուն, նաեւ Սուրիոյ իրավիճակին:

«Հանդիպումներուն ընթացքին կարեւոր նկատեցինք մեր երկու երկիրներուն միջեւ տնտեսական ոլորտի աշխուժութիւնը, Միացեալ Նահանգներու ուղղակի ներդրումներու յաւելումը Հայաստանի մէջ», յայտնեց Ճոն Պոլթըն:

Պոլթըն կը կարծէ, որ Հայաստանի մէջ կայանալիք արտահերթ խորհրդարանական ընտրութիւններուն գործող վարչապետի պաշտօնակատար Նիկոլ Փաշինեանի յաղթանակը լաւ կարելիութիւն պիտի տայ Ղարաբաղի հակամարտութեան կարգաւորման ուղղութեամբ քայլեր ձեռնարկելու համար:

«Եթէ նման պատրաստակամութիւն ըլլայ, մենք պիտի է աշխատինք, որ Ատրպէյճանի կողմէ նոյնպէս նոյն կերպ ըլլայ արձագանգը», նշեց ան:

Պոլթըն ըսաւ, որ Հայաստանի վարչապետի պաշտօնակատար Նիկոլ Փաշինեանի հետ հանդիպման ընթացքին ինք հարցուցած է, թէ որն է Փաշինեանի յաջողութեան գաղտնիքը, սակայն, ըստ Պոլթընի, Փաշինեան հրաժարած է գաղտնիքը բացայայտելէ:

«Թերեւս ընտրութիւններէն ետք, ամէն պարագայի, ան մեզի յայտնէ գաղտնիքը», կատակեց Ճոն Պոլթըն:

LEAVE A REPLY

Please enter your comment!
Please enter your name here