«Ֆրենք Միւլլըր»ի Հայազգի Հիմնադիրը Հայաստան Վերադարձողներու Համար 100 Միլիոն Տոլարի Ծրագիրի Մը Նախաձեռնած Է

0
499

Զուիցերահայ գործարար, «Ֆրենք Միւլլըր» աշխարհահռչակ ապրանքանիշի հիմնադիր, Մարսէյի մօտ Հայաստանի գլխաւոր հիւպատոս Վարդան Սրմաքեշ նախաձեռնած է նոր ծրագիրի մը՝ «Build Armenia» (Կառուցէ Հայաստան) հիմնադրամը, որուն միացած են շուրջ տասնեակ մը սփիւռքահայ գործարարներ:

Սկզբնական շրջանին, նախագիծին համար պիտի ներդրուի շուրջ 100 միլիոն տոլար, որ պիտի օժանդակէ հայերու վերադառնալու հայրենիք:

«Կը կարծեմ, որ այսօր Հայաստանի մէջ տիրող նոր եռանդը եւ օրէնսդրական դաշտի բարելաւումը պիտի նպաստեն ներդրումային ներհոսքին դէպի երկիր. բան մը, որ կրնայ լայնածաւալ հայրենադարձութեան առիթ հանդիսանալ», կ՛ըսէ Վարդան Սրմաքեշ՝ ընդգծելով, որ վերադարձող հայրենակիցներուն հիմնադրամը պէտք է տրամադրէ բնակութեան վայր եւ օժանդակէ աշխատանք ապահովելու հարցով:

Վերադարձողներուն համար պէտք է ստեղծուին պայմաններ. անոնք պէտք է կարենան օգտուիլ առողջապահական, կրթական եւ արհեստակցական կեդրոններէ, մասնաւորապէս կաշիի, ոսկերչական իրերու արտադրութեան ոլորտին մէջ եւ պէտք է ստեղծուի արտադրական շղթայ:

Ըստ Վարդան Սրմաքեշի, հիմնադրամի գործունէութիւնը պէտք է զարգանայ եւրոպական չափանիշերուն համապատասխան:

«Մենք բաց եւ թափանցիկ պիտի ըլլանք, որպէսզի բոլորը կարենան հետեւիլ մեր աշխատանքին եւ մեր նպատակային ծախսերուն», ըսած է գործարարը՝ աւելցնելով, որ հիմնադրամին կրնան միանալ նոր հայրենադարձներ, յատկապէս Ռուսիայէն:

«Ես վստահ եմ, որ եթէ մենք շարժինք ճիշդ ուղղութեամբ, պիտի կարենանք բարձրացնել Հայաստանի վարկանիշը միջազգային մակարդակով եւ ապահովել լայնածաւալ ներհոսք հայրենադարձներու, որոնք պիտի կարենան նոր Հայաստանի մէջ հասնիլ նոր յաջողութիւններու», ըսած է Վարդան Սրմաքեշ:

LEAVE A REPLY

Please enter your comment!
Please enter your name here