«Նիւ Եորք Թայմզ»ը Հարց Կու Տայ, Թէ Թրամփ Ինչո՛ւ Կը Պաշտպանէ Սէուտական Արաբիոյ Գահաժառանգ Իշխանը

0
749

ՆԻՒ ԵՈՐՔ.- Միացեալ Նահանգներու նախագահ Տանըլտ Թրամփ լրագրող Ճեմալ Խաշոկճիի սպանութեան հարցին մէջ ամէն գնով կը շարունակէ պաշտպան կանգնիլ Սէուտական Արաբիոյ գահաժառանգ իշխան Մուհամմատ պըն Սալմանին, հակառակ այն իրողութեան, որ գրեթէ բոլոր կողմերը, ներառեալ՝ «Սի.Այ.Էյ.»ը վստահ են, որ սպանութիւնը գործուած է իշխանին հրահանգով։

Թրամփ հաւատք չէ ընծայած նոյնիսկ «Սի.Այ.Էյ.»ի կողմէ այս մասին պատրաստուած զեկոյցին եւ նոյնիսկ կը մերժէ սպանութեան ընթացքին արձանագրուած ձայներուն ձայներիզը մտիկ ընել, հաւանաբար հետեւելով՝ «տգիտութիւնը երանութիւն է» սկզբունքին։

«Նիւ Եորք Թայմզ»ի մէջ, Մարք Լանտըրի ստորագրութեամբ հրատարակուած յօդուածը ունի հետաքրքրական խորագիր մը՝ «Հակառակ Խաշոկճիի Դէպքին Վերաբերեալ Փաստերուն, Թրամփ Ինչո՞ւ Կը Կանգնի Գահաժառանգ Իշխանին Կողքին»։

Յօդուածին մէջ կը նշուի, որ Թրամփ առաջին վայրկեանէն արդէն կարեւորութիւն չէ ընծայած իշխանին դէմ պնդումներուն եւ անտեսած է նոյնիսկ «Սի.Այ.Էյ.»ի տեղեկագիրը։

«Թրամփի համար բաւարար է, որ գահաժառանգ իշխանը ըսէ, թէ ինք կապ չէ ունեցած ոճիրին հետ։ Թրամփ «շատ տխուր է» ըսելով՝ մտիկ ընել իսկ չուզեց սպանութեան ձայներիզը, որ իր համոզումները անպայման պիտի փոխէր», կը գրէ Լանտըր։

Ան կը գրէ, որ Թրամփի այս կեցուածքը ցոյց կու տայ, թէ ան որքա՛ն կարեւորութիւն կու տայ Սէուտական Արաբիոյ հետ յարաբերութեանց, զայն նկատելով Միջին Արեւելքի մէջ Միացեալ Նահանգներու քաղաքականութեան նպաստող բանալի երկիրներէն մէկը եւ մանաւանդ՝ ամերիկեան զէնքերու լաւագոյն յաճախորդը, հակառակ անոր, որ Ռիատ տակաւին չէ վերջնականացուցած զէնքեր գնելու գծով շարք մը նախնական համաձայնագիրներ եւ իր պարտքերը լրիւ չէ վճարած։

LEAVE A REPLY

Please enter your comment!
Please enter your name here