«Երեւան Եւ Մոսկուա Կը Մօտենան «Սու-30Սի.Էմ.»ներու Մատակարարման Համաձայնագիրի Կնքման Եզրափակիչ Փուլին». Տօնոյեան

0
649

Հայաստան եւ Ռուսիա կ՛աւարտեն Երեւանին «Սու-30Սի.Էմ.» հալածիչներ մատակարարելու համաձայնագիրի կնքումը նախապատրաստելու ընթացակարգերը: Այս մասին Շաբաթ օր յայտարարեց Հայաստանի պաշտպանութեան նախարարի պաշտօնակատար Դաւիթ Տօնոյեան:

«Մենք կը ջանանք, որ անիկա շատ արագ իրականացուի: Կը մօտենանք համաձայնութեան կնքման եզրափակիչ փուլին», ըստ «ԹԱՍՍ»ի, ըսաւ Տօնոյեան ռուս լրագրողներու հետ հանդիպումի մը ընթացքին:

Ըստ անոր՝ երկու երկիրները միջպետական մակարդակով կ՛ա-ւարտեն Հայաստանին սպառազինութիւն գնելու համար 100 միլիոն տոլար ռուսական վարկի տրամադրման մասին համաձայնագիրի իրականացման ընթացակարգերը, մասնաւորաբար՝ սպառազինութեան որոշ տեսակներու մատակարարումներու հարցերով:

Տօնոյեան շեշտեց զինուորական ոլորտին մէջ ռուս գործընկերներու հետ սերտ համագործակցութիւնը: «Մենք կը նախապատրաստենք միացեալ քայլ: Ժամկէտները պիտի յայտնենք, երբ լուծուին որոշ հարցեր», ըսաւ ան՝ առանց յստակացնելու, թէ խօսքը ի՛նչ քայլի կը վերաբերի:

«ԹԱՍՍ» լրատու գործակալութիւնը կը նշէ, որ Հայաստանին արտածման վարկ տրամադրելու մասին համաձայնագիրը կնքուած էր 24 Հոկտեմբեր 2017ին: Վարկը Հայաստանին կը տրամադրուի 15 տարուան ժամկէտով եւ տարեկան 3 տոկոսով: Ըստ համաձայնագիրին՝ Երեւան վարկային միջոցներէն պէտք է օգտուի 2018-2022 տարիներուն:

LEAVE A REPLY

Please enter your comment!
Please enter your name here