Հայաստան ՀԱՊԿի Ընդհանուր Քարտուղարի Իր Թեկնածուն Ունի

0
644

Անդրադառնալով ՀԱՊԿի ընդհանուր քարտուղարի պաշտօնին շուրջ ստեղծուած կացութեան՝ պաշտպանութեան նախարարի պաշտօնակատար Դաւիթ Տօնոյեան յայտարարեց, որ Հայաստանի Հանրապետութիւնը ունի այդ պաշտօնին իր թեկնածուն եւ պատրաստ է շարունակելու ստանձնած լիազօրութիւններու կատարումը:

Նախարարի պաշտօնակատարը անդրադարձաւ նաեւ հայ-ռուսական դաշնակցային յարաբերութիւններուն՝ նշելով, որ Հայաստան մեծապէս կարեւոր կը նկատէ Ռուսիոյ հետ զինուորական եւ սպառազինման համագործակցութիւնը:

Խօսելով Արցախ-Ատրպէյճան հակամարտ զօրքերու շփման գիծին վրայ եւ Հայաստան-Ատրպէյճան սահմանին վրայ տիրող իրավիճակին մասին՝ Դաւիթ Տօնոյեան յայտնեց, որ վերջին շրջանին Ատրպէյճանի կողմէ զինադադարի խախտումներու թիւը նուազած է:

Պաշտպանութեան նախարարը նաեւ անդրադարձաւ կողմերուն միջեւ ստեղծուած գործնական կապին՝ նշելով, որ մինչ այդ Ատրպէյճանի հետ Հայաստանի կապը կը գործէր միայն Միջազգային Կարմիր Խաչի եւ ԵԱՀԿի ծիրին մէջ, եւ որ նոր հաստատուած կապը կրնայ նպաստել սահմանային լարուածութեան եւ զինադուլի խախտումներու թիւի նուազեցման:

Ան խօսեցաւ նաեւ Սուրիոյ ցուցաբերուող մարդասիրական օժանդակութեան մասին՝ շեշտելով, որ Հայաստան պիտի շարունակէ աջակցութիւն ցուցաբերել տագնապէն վնասուած բնակավայրերուն եւ Սուրիոյ հայ համայնքին:

LEAVE A REPLY

Please enter your comment!
Please enter your name here