Հայաստանի Մէջ Զգոյշ Ըլլալու Մասին Ամերիկայի Դեսպանատան Յայտարարութիւնը Տարակուսանք Կը Յառաջացնէ

0
1835

ԵՐԵՒԱՆ, «Երկիր».- Ամերիկայի Հայ Դատի յանձնախումբը եւ Հայաստանի ոստիկանութիւնը արձագանգեցին Հայաստանի մօտ Միացեալ Նահանգներու դեսպանատան կողմէ 12 Դեկտեմբերին տարածուած զգուշութեան կոչին։

Հայ Դատի յանձնախումբին համար անհասկանալի է, թէ ամերիկեան դեսպանատունը ինչո՛ւ կը նախազգուշացնէ յանցագործութեանց մասին՝ երկրի մը մէջ, ուր յանցաւորութեան մակարդակը ամենացածերէն մէկն է, եւ որ աշխարհի մէջ ամենաապահով վայրերէն մէկն է զբօսաշրջիկներու համար:

«Անհասկնալի է, թէ ինչո՛ւ մեր դեսպանութիւնը Հայաստանի մէջ գտնուող ամերիկացիներուն կոչ կ՛ընէ զգօն ըլլալու անդրազգային ահաբեկչական կազմակերպութիւններէ եւ անհատներէ եկող վտանգին պատճառով, որ որեւէ ներկայութիւն կամ նախադէպ չէ ունեցած Հայաստանի մէջ», յայտարարեց Ամերիկայի Հայ Դատի յանձնախումբը:

Իր կարգին, Հայաստանի ոստիկանութիւնը տարածեց պարզաբանում մը՝ ընդգծելով, որ Հայաստանի Հանրապետութեան մէջ ապահովական իրավիճակը անհանգստութեան առիթ չի տար եւ երկիրը ապահով է թէ՛ Հայաստանի քաղաքացիներուն եւ թէ զբօսաշրջիկներուն համար:

Ոստիկանութիւնը կը շեշտէ, թէ բազմաթիւ միջազգային կազմակերպութիւններ եւս ապահով գնահատած են Հայաստանը եւ մայրաքաղաք Երեւանը, շեշտելով, որ ոստիկանութիւնը եւ միւս իրաւապահ մարմինները ունին բոլոր հնարաւորութիւնները ու միջոցները եւ ամէն ինչ կը կատարեն այդ գնահատականը հաստատելու ու հասարակական ապահովութեան ամբողջական պահպանումը երաշխաւորելու համար, յատկապէս տօնական օրերուն:

LEAVE A REPLY

Please enter your comment!
Please enter your name here