Հայաստանի Նոր Կեանքը Կերտելու Պատասխանատուութիւնը Նաեւ ԱԺ-ի Ուսերուն է. Ամենայն Հայոցի Օրհնանքը Պատգամաւորներուն

0
311

Արմենփրէս՝   Երկուշաբթի,  14  Յունուարի առաւօտեան,  Ն.Ս.Օ.Տ.Տ. Գարեգին Բ. Ամենայն Հայոց Կաթողիկոսը  օրհնանքի  խօսք մը  յղեց    Հայաստանի   նորընտիր խորհրդարանի անդամներուն՝  առաջին նիստին առիթով:

Ամենայն Հայոց Կաթողիկոսը ողջունեց պատգամաւորներն ու իր հայրապետական օրհնութիւնը բերաւ անդրանիկ նիստին առիթով: «Արգասաբեր գործունէութեան առիթով կը շնորհաւորեմ նորընտիր պատգամաւորները: Այսօր դուք` իբրեւ ժողովուրդի վստահեալ ներկայացուցիչներ, կը ստանձնէք ձեր պարտականութիւնները: Հայաստանի նոր կեանքը կերտելու պատասխանատւութիւնը նաեւ ձեր ուսերուն է, քանզի մեր երկրի առաջընթացն ու զարգացումը մեծապէս կապուած է օրէնսդիր մարմինին գործունէութեամբ: Մեր ժողովուրդը բարեփոխումներու մեծ յոյսեր ու ակնկալիքներ ունի, միայն բարօրութեան ու կարիքներու հոգածութեան հրամայականը չէ, որ կը յուզէ մեր ժողովուրդը։ Մեր երկրի առաջ ծառացած են արտաքին հանգամանքներով պայմանաւորուած լրջագոյն մարտահրաւէրներ, որոնց դիմագրաւելու եւ շահեկան կերպով լուծումներու առաջնորդելու համար ներքին կեանքի մէջ պէտք է ունենանք հնարաւորինս քիչ խնդիրներ: Պետական-քաղաքական գործիչներու եւ ողջ հասարակութեան ընդհանուր բարեխղճութիւնը եւ քաղաքացիական պատասխանատւութիւնը մեր ժողովուրդի ներուժի համախմբման, մեր պետականութեան ամրապնդման, յուսալի ապագայի կերտման գլխաւոր պայմանն են»,- ըսաւ Վեհափառ Տէրը:

Ան շեշտեց` պատգամաւորներու օրէնսդրական ջանքերով պիտի ձեւաւորուին անհրաժեշտ միջավայր ու հնարաւորութիւններ` մեր երկրի տնտեսութեան շարունակական զարգացման, գիտութեան, կրթութեան, մշակոյթի առաջընթացի համար, մեր ժողովուրդի անվտանգութեան եւ խաղաղութեան ապահովման համար: Իսկ պատգամաւորներու հաստատած օրէնքները պիտի ծառայեն հասարակական կեանքի մէջ օրինականութեան, արդարութեան ամրապնդման, որոնք կը զօրացնեն մեր ընթացքը:

Ամենայն հայոց կաթողիկոսը վստահութիւն յայտնեց, որ պիտի արդիւնաւորուին նաեւ ԱԺ դահլիճին մէջ ընթացող քննարկումները եւ կայացուող որոշումները: Վեհափառ Տէրը շեշտեց` քաղաքական հայեացքներու եւ տեսակէտներու բազմակարծութեամբ հանդերձ` ժողովուրդի լուսաւոր ապագայի նոյն տեսլականը կը միաւորէ պատգամաւորները:

LEAVE A REPLY

Please enter your comment!
Please enter your name here