Ատրպէյճանի Մէջ Դժգոհութեան Աճը Կրնայ «Յեղափոխական Հետեւանքներ»ու Առաջնորդել. «Թուրան»

0
339

ԵՐԵՒԱՆ, «Ազատութիւն».- « Շաբաթ, 19 Յունուարին ատրպէյճանական ընդդիմութիւնը յաջողեցաւ վերջին 14 տարիներուն ընթացքին մեծագոյն հանրահաւաքը կատարել», կը նշէ Ատրպէյճանի ամենահեղինակաւոր անկախ լրատուամիջոցի՝ «Թուրան»ի ղեկավար Մեհման Ալիեւ, փորձելով բացատրել հանրութեան մօտ դժգոհութիւններու աճի պատճառները:

Գործակալութեան ռուսալեզու կայքին մէջ հրապարակած յօդուածին մէջ Ալիեւ կը պնդէ, որ Իլհամ Ալիեւի վարչակազմը լուրջ ճգնաժամի մէջ է՝ տնտեսական ծանր կացութեան, տեղեկատուական հոսքի առատութեան եւ ներիշխանական պայքարի հետեւանքով:

«Դժգոհութեան աճի հիմնական խթանը դարձաւ երկրին մէջ անհիմն կերպով ձգձգուած ընկերատնտեսական ճգնաժամը, որու շուտափոյթ յաղթահարման բնակչութեան յոյսերը չարդարացան», կը գրէ Մեհման Ալիեւ՝ ապացոյցներ տալով, թէ 2015-էն ի վեր երկրին տնտեսութիւնը որքան վատ վիճակի մէջ կը գտնուի:

«Ազգաբնակչութեան գրեթէ բոլոր խումբերու կենսամակարդակի անկումը կը շարունակուի: Միջին աշխատավարձքը 542 ամերիկեան տոլարէն նուազած է՝ հասնելով 224 տոլարի: Կենսական ապրանքներու գիները աճած են մօտաւորապէս 40 տոկոսով, իսկ մանաթը արժեզրկուած է աւելի քան երկու անգամ։ Ճգնաժամի միւս պատճառը համացանցի հասանելիութիւնն է, ինչ որ գրեթէ անարժէք դարձուցած են պետական քարոզչութեան ջանքերը: Իշխանամէտ տեղեկատուութեան հանդէպ վստահութիւնը օրէ օր կը հալի», կը նշէ ան:

Անդրադառնալով ներիշխանական պայքարին, ան կը գրէ. «Վերջին միտումները կը վկայեն, որ իշխանութիւնը աւելիով կը կեդրոնանայ նախագահի ձեռքին մէջ», աւելցնելով, որ վերը նշուած գործօնները «կրնան յանգեցնել յեղափոխական հետեւանքներու»:

LEAVE A REPLY

Please enter your comment!
Please enter your name here