Վարչապետ Փաշինեան Ընդունեց Հարաւային Կովկասի Եւ Վրաստանի Ճգնաժամի Հարցերու Եւրոպական Միութեան Յատուկ Ներկայացուցիչը

0
253

ԵՐԵՒԱՆ.- Վարչապետ Նիկոլ Փաշինեան ընդունեց Հարաւային Կովկասի եւ Վրաստանի ճգնաժամի հարցերու Եւրոպական Միութեան յատուկ ներկայացուցիչ Թոյվօ Քլաարը:

Վարչապետը կարեւոր համարեց Եւրոպական Միութեան հետ յարաբերութիւններու շարունակական զարգացումը եւ կառուցողական երկխօսութիւնը բոլոր ոլորտներուն մէջ: Նիկոլ Փաշինեան ընդգծեց Եւրոպական Միութեան անդամ երկիրներուն կողմէ Համապարփակ եւ ընդլայնուած գործընկերութեան համաձայնագիրի ըստ կարելւոյն սեղմ ժամկէտներու մէջ վաւերացման անհրաժեշտութիւնը եւ յայտնեց, որ անիկա կարելիութիւն կու տայ նոր թափ հաղորդելու փոխադարձ գործակցութեան ու կը նպաստէ երկրին մէջ տարբեր մարզերու բարեփոխումներու իրականացման:

Վարչապետը ընդգծեց, որ Հայաստանի կառավարութիւնը հաստատակամ է ժողովրդավարութեան զարգացման, մարդու իրաւունքներու պաշտպանութեան, խօսքի ազատութեան ամրապնդման, արդար դատական համակարգի կայացման ուղղութիւններով համակարգային բարեփոխումներու իրականացման գործին մէջ եւ այդ նպատակով կարեւոր կը նկատէ Հայաստանի Հանրապետութիւն-Եւրոպական Միութիւն համաձայնագիրով նախատեսուած օժանդակութիւնը եւ համապատասխան ծրագիրներու արդիւնաւէտ իրականացումը:

Թոյվօ Քլաար, իր կարգին ընդգծեց, որ Եւրոպական Միութիւնը նոյնպէս կարեւոր կը համարէ Հայաստանի հետ յարաբերութիւններու զարգացումը եւ ընդլայնումը ու յայտնած, որ երկկողմանի փոխադարձ գործակցութիւնը պիտի շարունակուի ընդլայնիլ նաեւ համաձայնագիրի ժամանակաւոր կիրարկումով:

Հանդիպումին ընթացքին զրուցակիցները քննարկեցին արցախեան տագնապի խաղաղ լուծման վերաբերող շարք մը հարցեր: Նիկոլ Փաշինեան նշեց, որ Հայաստան հաւատարիմ է տագնապի խաղաղ լուծման՝ ԵԱՀԿի Մինսկի խմբակի համանախագահութեան ձեւաչափի շրջագիծին մէջ:

LEAVE A REPLY

Please enter your comment!
Please enter your name here