ՀԱՅ ԵՐԱԺՇՏՈՒԹԵԱՆ ՎԱՐՊԵՏ՝ ՏԻԳՐԱՆ ՄԱՆՍՈՒՐԵԱՆ ՀԲԸՄ-ՀԵԸ-Ի ՅԱՐԿԻՆ ՏԱԿ

0
1249

Մեծի Տանն  Կիլիկիոյ ՆՍՕՏՏ Արամ  Ա. Վեհափառին հրաւէրով  Լիբանան  ժամանած  հայրենի  համբաւաւոր  արուեստագէտ,  երգահան,  յօրինող  Տիգրան Մանսուրեան, Լիբանանահայ մշակութային  միութիւններու    հետ  հանդիպումներու  ծիրին մէջ,  Ուրբաթ,  15   Փետրուար  2019-ի երեկոյեան  այցելեց  ՀԲԸՄ-ի  Տեմիրճեան կեդրոն,  ուր   ի պատիւ   հայրենի հիւրին   ՀԵԸ    Անդրանիկ  Մշակութային Միութիւնը  կազմակերպած էր  գողտրիկ  երեկոյ  մը:

Ի ներկայութիւն,  ՀԲԸՄ-ի Լիբանանի Շրջանակային   Յանձնաժողովի   ներկայացուցիչներու, ՀԵԸ-ի  Կեդրոնական Վարչութեան ատենապետին եւ անդամներու,  ՀԵԸ-ի մշակութային միաւորներու վարչութիւնները ներկայացնող  ընտրանիի մը, ՀԵԸ-ի Անդրանիկ  Մշակութային  Միութեան ատենապետ  Շահէ Պապահեքեան  բարի գալուստ մաղթեց    հայրենի հիւրին եւ ներկաներուն, պատիւ համարելով   միութեան  յարկին տակ ընդունիլ մեծանուն  յօրինող, երաժշտագէտը: Ան  դիտել տուաւ,  թէ  անկարելի պիտի ըլլայ  քանի մը վայրկեանի մէջ   ներկայացնել Տիգրան Մանսուրեանի կենսագրականը:  Ապա Շահէ Պապահեքեան անդրադարձաւ   Տիգրան Մանսուրեանի   կեանքի  հանգրուաններուն, մանկութիւնը,  հայրենադարձութիւնը, երաժշտական ասպարէզ մուտքը, ճանաչումը   հայրենի եւ  միջազգային  բեմահարթակներու վրայ:

Տեսաերիզի  վրայ  ցուցադրուեցաւ Տիգրան Մանսուրեանի կեանքի   հանգրուանները  յատկանշող  ժապաւէն մը: Մայէսթրոյի   80-ամեակին առիթով,  Հայաստանի մշակոյթի նախարարութեան  պաշտօնէութեան եւ  վարչապետ Նիկոլ Փաշինեանի   անակնկալ այցելութիւնը անոր  բնակարանը:

Սրտի խօսք  փոխանցեց ՀԵԸ-ի մամլոյ եւ տեղեկատուական գրասենեակի  պատասխանատու Ահարոն Շխրտըմեանը:  Թանկագին  Մայէսթրոյին արժեւորումը կատարելէ ետք, ան, յանուն  ՀԲԸՄ-ի, ՀԵԸ-ի ղեկավարութեան   եւ  համայն միութենականներուն   շնորհաւորեց  յոբելեարը՝   80-ամեակին առիթով, մաղթելով առողջութիւն, ստեղծագործական  նորանոր  նուաճումներ, ի  փառս հայ մշակոյթի զարգացման եւ տարածման: Ահարոն Շխրտըմեան իր խօսքը եզրափակեց   վկայակոչելով  Տիգրան  Մանսուրեանի մասին հայրենի  արուեստագէտ Երուանդ Ղազանչեանի   տպաւորութիւնները.« Եզրակացնելով՝   պիտի   մէջբերեմ Հայաստանի  ժողովրդային արուեստագէտ  Երուանդ  Ղազանչեանի տպաւորութիւնները:   Ի դէպ յայտնեմ, թէ  Երուանդ Ղազանչեան   երկար  տարիներ եղած է  ՀԲԸՄ-ի  Հայ Երիտասարդաց  Ընկերակցութեան  «Վահրամ Փափազեան» թատերախումբին  բեմադրիչը».ըսաւ ան,  խօսքը տալով   Երուանդ Ղազանչեանին.«Մանսուրեանի մասին կարելի է խօսիլ առաւօտէն  մինչեւ գիշեր, գիշերէն՝ լուսաբաց: Հայոց   լեզուի մէջ բառեր կան, որոնք  քիչ կ’օգտագործուին, օրինակ՝  “պարկեշտ”  եւ “ազնուագոյն” բառերը:   Տիգրանը  պարկեշտ եւ ազնուագոյն մարդ է: Ան, իր  աշխատանքով  կ’արդարացնէ  ազգանունին վերջին  «եան»ը»:

 

Հայրենի սիրուած  յօրինող երաժշտագէտ, արուեստագէտ Տիգրան Մանսուրեան յայտնեց, թէ  բաւական դժուար եղած է  անոր  կեանքի  ճանապարհը: Սակայն ինք մնացած է լաւատես  եւ  համբերատարութեամբ պայքարած է  զանազան  դժուարութիւններու դէմ: Մանսուրեան ըսաւ, թէ   հաւատարիմ մնացած է  իր  սկզբունքներուն, բազում զոհողութիւններով պահպանած է իր  ինքնուրոյնութիւնը եւ   վերջաւորութեան արժանացած է  երկար ժամանակ  իրմէ  զլացուած  համբաւին: Այսօր, անոր  ութսունամեակը   մեծ  տարողութեամբ  կը  նշուի  սփիւռքի եւ  հայրենիքի մէջ:

Մանսուրեան ըսաւ, թէ  մանկութենէն սիրած է  գիւղը, անոր  հանդարտ   բնութիւնը, անմեղ    բնակիչները, գիւղի առօրեան:  Պատահական  չէ, որ իր գործերուն մէջ  տեղ գտած  են այդ ապրումները:  Աշխատելով  հանդերձ արտերկրի  համբաւաւոր   նուագախումբերու,  յօրինողներու,   երաժշտագէտներու հետ, անոր կարծիքով,  Հայաստանը այն  հողն է, որ պարարտ  ենթահող  ծառայած է իր ստեղծագործութիւններուն:

Պատասխանելով ներկաներու  հարցումներուն,   Տիգրան Մանսուրեան  վերյիշեց   իր մանկութեան  օրերը, ծննդավայրը՝ Պէյրութը, Այն Մըրէսիի  թաղամասը,  մանկութեան տարիներուն  լսած եւ սորված արաբերէն  երգերը, նաեւ  խօսեցաւ մօտիկ ապագայի  ծրագիրներու մասին:

 

Տիգրան Մանսուրեան իր հիացմունքը յայտնեց  Հայկական Բարեգործական   Ընդհանուր Միութեան եւ Հայ Երիտասարդաց Ընկերակցութեան   ծաւալած աշխատանքին: Ան  ըսաւ, թէ  բազմաթիւ առիթներով  գործակցած  է  ՀԲԸՄ-ի հետ:  Յարատեւ  վերելք եւ նորանոր   յաջողութիւններ մաղթեց  ՀԲԸՄ-ին:

Հանդիպումի աւարտին,  ՀԵԸ-ի Կեդրոնական Վարչութեան ատենապետ Վիգէն Չերչեան եւ   Անդրանիկ Մշակութային  Միութեան ատենապետ  Շահէ   Պապահեքեան գնահատանքի  յուշանուէրով մը պատուեցին Տիգրան Մանսուրեանը:

Ապա տեղի ունեցաւ  հիւրասիրութիւն, որուն  ընթացքին  ներկաները աւելի մօտէն  ծանօթացան Տիգրան  Մանսուրեան  Մարդուն եւ Արուեստագէտին:

ՀԵԸ-Ի ՄԱՄԼՈՅ ԵՒ ՏԵՂԵԿԱՏՈՒԱԿԱՆ ԳՐԱՍԵՆԵԱԿ

LEAVE A REPLY

Please enter your comment!
Please enter your name here