Հայաստան Կը Դատապարտէ Կարէն Ղազարեանի Դէմ Ատրպէյճանի Դատարանին Վճիռը

0
662

ԵՐԵՒԱՆ.- Հայաստան կը դատապարտէ ատրպէյճանական դատարանին՝ միջազգային մարդասիրական իրաւունքի ակնյայտ խախտումով տրուած Հայաստանի քաղաքացի Կարէն Ղազարեանի գործով դատավճիռը, որուն իրական հեղինակը Ատրպէյճանի ղեկավարութիւնն է: Այս մասին ըսուած է Հայաստանի արտաքին գործոց նախարարութեան մամլոյ խօսնակ Աննա Նաղդալեանի մեկնաբանութեան մէջ:

«Ցաւօք, Ատրպէյճանի իշխանութիւնները, չբաւարարուելով անյայտ հանգամանքներու մէջ Ատրպէյճանի տարածքը յայտնուած Կարէն Ղազարեանի նկատմամբ սխալ յիշեցնող դատական գործընթացի նախաձեռնութեամբ, աւելի հեռուն գացին եւ ակնյայտ առողջական խնդիրներ ունեցող մեր քաղաքացիին գործը «արագացուած կարգով» քննելով՝ տուին 20 տարուան ազատազրկման դատավճիռ: Ոեւէ մէկուն համար գաղտնիք չէ պետական մակարդակով Կարէն Ղազարեանի պատանդառութեան իրական նպատակը, սակայն այդ ջանքերը չեն կրնար յաջողութեան հասնիլ: Թէ՛ Հայաստանի եւ թէ Արցախի համար գերակայութիւն են հակամարտութեան գօտիին վրայ ապրող մարդոց իրաւունքները եւ միջազգային մարդասիրական իրաւունքը: Աւելին, Արցախի իշխանութիւններուն վերջերս տուած որոշումը՝ ազատ արձակելու համաչափ պատիժը կրած ատրպէյճանական զինծառայողը, լաւագոյնս կը վկայէ իրաւունքի գերակայութեան եւ միջազգային մարդասիրական իրաւունքին հանդէպ հայկական կողմին հաւատարմութեան մասին: Սակայն, ազգային ատելութեան հողի վրայ կատարուած անչափահասի սպանութիւնը կը գտնուի այլ իրաւական, ինչպէս նաեւ բարոյական հարթութեան վրայ, առաւել եւս, երբ մեր յիշողութեան մէջ վառ է նմանօրինակ յանցագործութիւններու եւ զանոնք իրականացնողներուն համապետական հերոսացումը: 15 տարի առաջ, նոյն դրդապատճառներով սպանութեան համար հերոսացուած մարդասպանին անպատժելիութիւնը ամէնօրեայ յիշեցում է, որ ո՛չ մեր տարածաշրջանին եւ ո՛չ ալ միջազգային հանրութեան պէտք են նմանօրինակ նոր «հերոսները»», ըսուած է Աննա Նաղդալեանի մեկնաբանութեան մէջ:

Ան կը նշէ, որ Հայաստան հետեւողական ջանքեր պիտի գործադրէ իր քաղաքացիին իրաւունքները պաշտպանելու եւ ազատ արձակելու ուղղութեամբ:

 

LEAVE A REPLY

Please enter your comment!
Please enter your name here