Չաւուշօղլու Աւելորդ Կը Նկատէ «Էս. 400» Համակարգերէն Հրաժարելու Կոչերը

0
428

ՊՈԼԻՍ, «Մարմարա».- Թուրքիոյ արտաքին գործոց նախարար Մեւլուտ Չաւուշօղլու երկրին իշխող եւ ազգայնամոլ կուսակցութիւններու ներկայացուցիչներու հետ հանդիպման մը ընթացքին անդրադարձաւ ռուսական «Էս. 400» հակաօդային հրթիռային համակարգերու շուրջ ստեղծուած իրավիճակին ու ըսաւ, որ զանոնք գնելու հարցը այլընտրանք չունի եւ անոնց մասին խօսիլը արդէն աւելորդ է։

«Ամէն ինչ աւարտած է եւ Թուրքիա երբեք իր խօսքէն ետքայլ պիտի չընէ», յայտարարեց Չաւուշօղլու։

Թուրքիա ու Ռուսիա «Էս. 400»ներ գնելու մասին պայմանագիր ստորագրած էին ու կ՛ակնկալուի, որ 2019-ի վերջաւորութեան հրթիռային համակարգերուն առաջին մասը տրամադրուի Թուրքիոյ։

Միացեալ Նահանգներու եւ ՆԱԹՕ-ի ղեկավարութիւնը դէմ են, որ ռուսական համակարգերը Թուրքիոյ ծախուին եւ կոչեր կը կատարեն Անգարայի, որ հրաժարի այդ մտադրութենէն։

Դիտել տանք, որ ռուս մասնագէտ Սերկէյ Սուտաքով ըսաւ, որ ամերիկեան «Էֆ. 35» ռազմական օդանաւերը անզօր են «Էս. 400»ներու դէմ եւ այդ է պատճառը, որ Ամերիկա ամէն կերպով կ՛ուզէ արգելք ըլլալ վաճառքին։ Կարգ մը քոնկրեսականներ կը փորձեն կասեցնել Թուրքիոյ «Էֆ. 35»ներ ծախելու ծրագիրը, եթէ Անգարա հաստատ մնայ «Էս. 400»ներ գնելու իր կեցուածքին վրայ։

LEAVE A REPLY

Please enter your comment!
Please enter your name here