«ԱՌԱՋԻՆ ԼՐԱՏՈՒԱԿԱՆ»Ի ՀԱՐՑԱԶՐՈՒՅՑԸ «ԱԶԴԱԿ» ՕՐԱԹԵՐԹԻ ԳԼԽԱՒՈՐ ԽՄԲԱԳԻՐ ՇԱՀԱՆ ԳԱՆՏԱՀԱՐԵԱՆԻ ՀԵՏ

0
2156

«Ներդրումները Գաղափարական Կամ Բարոյական, Հայրենասիրական Մղումներով Չեն Խթանուի. Անհրաժեշտ Են Վստահելի Դրոյթները»

Վարեց՝ ՍԻՐԱՆՈՅՇ ՊԱՊԵԱՆ

«Առաջին Լրատուական»ի զրուցակիցն է Լիբանանի «Ազդակ» օրաթերթի գլխաւոր խմբագիր Շահան Գանտահարեանը:

ՍԻՐԱՆՈՅՇ ՊԱՊԵԱՆ.- Պարոն Գանտահարեան, իրանահայ համայնքի հետ հանդիպմանը վարչապետ Փաշինեանը խօսեց համազգային օրակարգի մասին: Ինչպէ՞ս էք գնահատում, ինչպէ՞ս էք պատկերացնում այն:

ՇԱՀԱՆ ԳԱՆՏԱՀԱՐԵԱՆ.- Կարծում եմ՝ ճիշդ բանաձեւում տուեց վարչապետը: Համահայկական շատ խնդիրներ ունենք, որոնք թէ՛ ՀՀին, թէ՛ արցախի՛ն եւ թէ Սփիւռքին են վերաբերում: Իսկ համազգային խնդիրները Համահայկական ներկայացուածութեան ձեւաչափով պէտք է քննարկել: Հետեւաբար, հերթական անգամ ընդգծւում է նոր կառուցակարգի հրամայականը:

 

ՍԻՐԱՆՈՅՇ ՊԱՊԵԱՆ.- Վարչապետը խօսում է նաեւ տնտեսական յեղափոխութեան մասին: Ինչպէ՞ս էք պատկերացնում տնտեսական յեղափոխութեանը ձեր մասնակցութիւնը:

ՇԱՀԱՆ ԳԱՆՏԱՀԱՐԵԱՆ.- Ես ընկալում եմ առաջադրանքը իբրեւ մեր երկրի թռիչքաձեւ զարգացման հրամայական, որի կատարողականութիւնը այս դէպքում սերտօրէն առնչւում է, եթէ ոչ՝ պայմանաւորւում Սփիւռքով: Զարգացումը բազմավեկտոր (բազմաթիւ միջաշառաւիղ ունեցող-Խմբ.) պիտի լինի տարբեր ոլորտների՝ կրթութիւնից մինչեւ ներդրումային եւ տնտեսական: Այստեղ եւս ինքզինք զգալի է դարձնում համահայկական թէկուզ այս հանգրուանին խորհրդատուական բնոյթի կառոյցը: Ազգի համրանքի մեծամասնութիւնը Սփիւռքում է, որի թէ՛ մասնագիտական եւ թէ տնտեսական ներուժը առանց յապաղելու պէտք է ուղղորդել ՀՀի թռիչքաձեւ զարգացմանը: Սփիւռքի համայնքները պէտք է ստանձնեն կամրջի հանգամանք ՀՀի եւ իրենց ապրած երկրների միջպետական համագործակցութեան ծաւալման ուղղութեամբ:

 

ՍԻՐԱՆՈՅՇ ՊԱՊԵԱՆ.- Սփիւռքը որքանո՞վ է հետաքրքրուած Հայաստանում ներդրումներ իրականացնելով, որքանո՞վ է դաշտը ներդրումների համար նպաստաւոր համարում:

ՇԱՀԱՆ ԳԱՆՏԱՀԱՐԵԱՆ.- Կարծում եմ՝ ներդրումները գաղափարական կամ բարոյական, հայրենասիրական մղումներով չեն խթանուի: Այստեղ անհրաժեշտ են իրաւական պետութիւն, ներդրումային վստահելի դրոյթներ, հակամենաշնորհային պաշտպանուածութիւն եւ շահութաբեր տիրոյթների հեռանկարայնութիւն:

 

ՍԻՐԱՆՈՅՇ ՊԱՊԵԱՆ.- Սփիւռքի նախարարութիւն այլեւս չենք ունենայ, փոխարէնը Հայաստանի Հանրապետութեան վարչապետի աշխատակազմը կ՛ունենայ Սփիւռքի գծով յատուկ յանձնարարութիւնների դեսպան: Ինչպէ՞ս էք գնահատում:

ՇԱՀԱՆ ԳԱՆՏԱՀԱՐԵԱՆ.- Ես կողմ էի, որ գործեր առանձին գերատեսչութիւն: Սկզբունքային առումով կողմ եմ, որ Սփիւռքի հետ առնչուած վերակառուցակարգման եւ վերաիմաստաւորման առաջադրանքները ձեւակերպուեն սփիւռքեան մարդուժի մասնակցութեամբ: Քննարկումները լինեն համատեղ:

Հիմա որոշումը կայ գրասենեակի: Գրասենեակի եւ յանձնակատարի գործառոյթների կամ ծրագրերի մշակման գործընթացին, կարծում եմ, սփիւռքեան մարդուժը տարբեր ոլորտներում անհրաժեշտ է, որ ներգրաւուի:

 

ՍԻՐԱՆՈՅՇ ՊԱՊԵԱՆ.- Սփիւռքի մարդուժի՝ այդ գործընթացին մասնակից դարձնելն ինչպէ՞ս էք պատկերացնում:

ՇԱՀԱՆ ԳԱՆՏԱՀԱՐԵԱՆ.- Սփիւռքի նախարարութիւնում տարբեր ոլորտներում աշխատող մարդուժի անուանացանկերի կամ մարդկային պաշարների տուեալներ կան: Աշխատել են նաեւ իւրաքանչիւր ոլորտի աշխատանքները համակարգող խորհուրդներ: Սա՝ մասնագիտական առումով: Իհարկէ, կառուցակարգային առումով կան Սփիւռքում գործող աւանդական կառոյցներ, որոնց ներկայացուցիչները մասնակցում էին համահայկական օրակարգերի յատկացուած խորհրդակցութիւններին: Անցած ճանապարհի ձեռք բերած փորձը պէտք է նկատի ունենալ վերածրագրաւորումներ մշակելու ընթացքում:

LEAVE A REPLY

Please enter your comment!
Please enter your name here