ՆԱԹՕ-ն Մտադիր Է Շարունակել Համագործակցութիւնը Հայաստանի Հետ

0
673

ԵՐԵՒԱՆ.- Հարաւային Կովկասի եւ Կեդրոնական Ասիոյ մէջ ՆԱԹՕ-ի գլխաւոր քարտուղարի յատուկ ներկայացուցիչ Ճէյմզ Ապաթուրա Երկուշաբթի, 11 Մարտին, Երեւանի մէջ տեղի ունեցած մամլոյ ասուլիսին ընթացքին նշեց, որ ինք՝ իբրեւ ՆԱԹՕ-ի ներկայացուցիչ, կանոնաւորպէս կ՛այցելէ Հայաստան:

«ՆԱԹՕ-ն եւ Հայաստանի Հանրապետութիւնը կայուն եւ բովանդակային յարաբերութիւններ ունեցած են, առանց քաղաքական բարդութիւններու: Այսօրուան իմ հանդիպումները նախագահին, արտաքին գործոց եւ պաշտպանութեան նախարարներուն ու Ազգային ժողովի նախագահին հետ վերահաստատեցին, որ Հայաստան մտադիր է կայուն յարաբերութիւնները շարունակելու ՆԱԹՕ-ի հետ թէ՛ արտաքին յարաբերութիւններու, թէ՛ պաշտպանութեան բնագաւառին մէջ եւ ես բոլոր զրուցակիցներուն հաւաստիացուցի, որ ՆԱԹՕ-ն նոյնպէս մտադիր է նոյն հաստատուն ուղին բռնած՝ շարունակել համագործակցութիւնը», յայտարարեց Ապաթուրա:

ՆԱԹՕ-ի պաշտօնեան նշեց, որ ինք կը փափաքի իր երախտագիտութիւնը յայտնել Հայաստանի կողմէ ցուցաբերուած օժանդակութեան համար՝ Աֆղանիստանի եւ Քոսովոյի մէջ, եւ նշեց, որ այդ առումով Հայաստանի նպաստը նշանակալի է եւ գնահատուած:

«Մենք նկատած ենք, որ Հայաստանի Հանրապետութիւնը ՆԱԹՕ-ի շրջանակներէն դուրս իր նպաստը կը բերէ նաեւ խաղաղութեան գործընթացին: Ես պաշտպանութեան նախարարին ըսած եմ, որ Հայաստանի համագործակցութիւնը ՆԱԹՕ-ի հետ կ՛օգնէ նաեւ ՆԱԹՕ-ի ծիրէն դուրս իր միւս խաղաղապահպան գործողութիւններուն», ըսաւ Ապաթուրա: Ան կարեւոր համարեց կաշառակերութեան դէմ պայքարի ոլորտի մէջ Հայաստանի իշխանութիւններուն տարած աշխատանքը եւ այդ առումով եւս պատրաստակամութիւն յայտնեց աջակցելու Հայաստանին:

Անդրադառնալով Ատրպէյճանի զօրավարժութիւններուն՝ ան ըսաւ, որ այս առումով ՆԱԹՕի սկզբունքային դիրքորոշումը այն է, որ չի մասնակցիր եւ չի միջամտեր այդօրինակ հակամարտութիւններու:

«ՆԱԹՕ-ի գնահատումով՝ անհերքելի է, որ այս տարածաշրջանին մէջ խաղաղութիւնը կը հետաքրքրէ ՆԱԹՕին: Մեզ կը խրախուսէ եւ կը քաջալերէ, որ նոր իշխանութիւնը նոր ջանքեր կը թափէ բանակցային գործընթացին մէջ, մեզ նաեւ կը քաջալերէ շփման գիծին երկայնքով հրաձգութիւններու շօշափելի նուազումը: ՆԱԹՕի գնահատականը աներկբայօրէն այն է, որ այս հակամարտութիւնը բացառապէս խաղաղ ճանապարհով պէտք է հանգուցալուծուի, ռազմական լուծում չի կրնար ունենալ այս հակամարտութիւնը, եւ ասիկա ուղերձն է, զոր կը փոխանցեմ բոլոր կողմերուն», ըսաւ ան:

LEAVE A REPLY

Please enter your comment!
Please enter your name here