Բանակցութիւններուն Մէջ Որեւէ Փոփոխութիւն Պէտք է Ընդունելի Ըլլայ Բոլորին Համար. Լայչաք

0
612

ԵՐԵՒԱՆ, «Ազատութիւն», «Ամերիկայի Ձայն».- Չորեքշաբթի, 13 Մարտին, ԵԱՀԿի գործող նախագահ եւ Սլովաքիոյ արտաքին գործոց նախարար Միրոսլաւ Լայչաք Երեւանի մէջ Հայաստանի արտաքին գործոց նախարար Զօհրապ Մնացականեանի հետ ունեցած հանդիպումէն ետք տրուած միացեալ մամլոյ ասուլիսին ընթացքին յայտարարեց, որ Արցախի հիմնահարցին շուրջ բանակցութիւններու ձեւաչափին մէջ որեւէ փոփոխութիւն պէտք է ընդունելի ըլլայ բոլոր կողմերուն համար:

«Մենք ունինք գործընթաց, որ արդէն ընթացքի մէջ է գործող ձեւաչափով եւ որ արդէն իսկ որոշ արդիւնքներու հասած է: Անշուշտ, Հայաստանի կառավարութիւնը ինք պիտի որոշէ, թէ ինչպէ՛ս պիտի աշխատի, բայց բանակցային ձեւաչափին մէջ որեւէ փոփոխութիւն պէտք է ընդունելի ըլլայ բոլոր կողմերուն համար: Մենք բաւարար ժամանակ պիտի յատկացնենք այս խնդիրներու քննարկման համար: Վստահ եմ, որ Հայաստանի կառավարութիւնը ճիշդ բանաձեւը ունի բանակցութիւններու շարունակութեան վերաբերեալ համապատասխան ձեւաչափին մէջ», ըսաւ Լայչաք, աւելցնելով. «Ես պատրաստ եմ կարելիս ընելու, որպէսզի օգտակար ըլլամ ու կարենամ օգնել հակամարտութեան լուծումը գտնելու ջանքերուն: Ամբողջովին կը վստահիմ ԵԱՀԿի Մինսկի խմբակի համանախագահներուն»:

Իր կարգին, Զօհրապ Մնացականեան նշեց, որ Լայչաքի հետ հանդիպման ընթացքին վերահաստատած է, որ Արցախի ապահովութեան ապահովումը եւ Արցախի կարգավիճակը Հայաստանի համար եղած են եւ կը մնան բացարձակ գերակայութիւններ:

Ան կրկնեց նաեւ այն մօտեցումը, որ կը վերաբերի Արցախի ձայնի ու ներգրաւուածութեան ապահովման։

Մնացականեան Փաշինեան-Ալիեւ հաւանական հանդիպման թուական չնշեց. ան միայն վերահաստատեց Հայաստանի յանձնառութիւնը՝ ԵԱՀԿի Մինսկի խմբակի համանախագահութեան հովանիին տակ շարունակելու հիմնահարցի բացառապէս խաղաղ կարգաւորումը:

«Այս օրերին Ադրբեջանի կողմից յարձակողական բնոյթի լայնածաւալ զօրավարժութիւնների իրականացումը առանց համապատասխան ծանուցման, ոտնահարելով ԵԱՀԿ գործիքակազմով նախատեսուած միջազգային պարտաւորութիւնների պահանջները, չի նպաստում տարածաշրջանային անվտանգութեան եւ վստահութեան մթնոլորտի ամրապնդմանը», ընդգծեց Մնացականեան:

Ստեփանակերտի մէջ 12 Մարտին տեղի ունեցած Հայաստանի եւ Արցախի Անվտանգութեան խորհուրդներու համատեղ նիստին ընթացքին Հայաստանի վարչապետ Նիկոլ Փաշինեան անդրադարձած էր Արցախի հարցի կարգաւորման նպատակով, ԵԱՀԿ Մինսկի խմբակի համանախագահներուն կողմէ առաջարկուող սկզբունքներուն՝ ըսելով, որ ա-նոնք պարզաբանման կարիք ունին:

LEAVE A REPLY

Please enter your comment!
Please enter your name here