«Բարգաւաճ Հայաստան»ի Պատգամաւորները Խորհրդարան Մտան Արցախի Դրօշներով

0
362

ԵՐԵՒԱՆ.- Ազգային ժողովի արտահերթ նիստին, «Բարգաւաճ Հայաստան» խմբակցութեան անդամները Ազգային ժողովի նիստերու դահլիճը մտան Արցախի Հանրապետութեան դրօշներով:

«Բարգաւաճ Հայաստան»ի պատգամաւոր Նայիրա Զոհրապեան, պատասխանելով լրագրողներու հարցումին, թէ ինչ նպատակ կը հետապնդէ իրենց քայլը՝ ըսաւ. «Ասիկա կը խորհրդանշէ այն, որ Արցախը ես եմ, Արցախը մեզմէ իւրաքանչիւրն է»:

Ըստ պատգամաւորներուն՝ այս քայլը պատասխան է ԵԱՀԿ Մինսկի խումբի համանախագահներու յայտարարութիւններուն, որոնք, ըստ էութեան, հայկական կողմին համար անընդունելի են:

Հարցումին, թէ արդեօք հայկական կողմին վրայ ճնշումներ կը տեսնե՞ն, կամ արդեօք պատերազմի վտանգ կա՞յ՝ Զոհրապեան ըսաւ, որ ոչ, բայց այսպիսով ցոյց կու տան Արցախի հետ իրենց միասնականութիւնը, կը յայտնէ «Թերթ»ը:

Նշենք, որ խորհրդարանի արտահերթ նիստէն առաջ, «Բարգաւաճ Հայաստան»ի ղեկավար Գագիկ Ծառուկեան յայտարարեց, որ այսպիսով անոնք կը փափաքին իրենց աջակցութիւնը յայտնել Արցախի Հանրապետութեան եւ Արցախի ժողովուրդին:

«Մենք պէտք է ամբողջ ազգով բարձրացնենք այս հարցը՝ անկախ այն բանէն, թէ իշխանութեան կ՛աջակցինք, թէ ընդդիմութիւն ենք: Մենք պէտք է կարենանք ընդհանուր որոշում տալ, որովհետեւ այս հարցը պիտի լուծէ ամբողջ ժողովուրդի ճակատագիրը», ընդգծեց Ծառուկեան:

LEAVE A REPLY

Please enter your comment!
Please enter your name here