Զանգեզուրի Պղնձամոլիբդենային Ընկերութիւնը 382 Միլիոն Դրամ Տուգանք Պիտի Վճարէ

0
416

ԵՐԵՒԱՆ, «ՓանԱրմինիըն».- Բնապահպանութեան եւ ընդերքի տեսչական մարմինը Զանգեզուրի պղնձամոլիբդենային ընկերութեան 10 Սեպտեմբեր 2018-էն 22 Յունուար 2019, գործունէութիւնը ստուգելու ընթացքին յայտնաբերած է, որ ընկերութեան պատկանող Արծուանիկի պոչամբարի յարակից Արծուանիկ, Չափնի եւ Սեւաքար գիւղերու 18,5 հեկտար հողամասերը ծածկուած են պոչանքներով:

Արտահոսք եղած է նաեւ ընկերութեան պատկանող խողովակներէն: 24 Սեպտեմբեր 2018-ին տեղի ունեցած արկածին հետեւանքով Ողջի գետի ջրաւազան արտանետուած են 1,97 թոն վտանգաւոր նիւթեր: 2018-ի 3-րդ եռամսեակին, ջրային աւազան  արտանետուած է 0,29 քիլոկրամ զինկ:

1 Նոյեմբեր 2014-էն  20 Ապրիլ 2017, ընկերութիւնը աշխատած է առանց մթնոլորտային արտանետումները չափելու:

Տեսչական մարմինը բացայայտած է, որ այդ ժամանակահատուածին մթնոլորտին մէջ արտանետուած է 1754,92 թոն փոշի, 435,78 թոն ածխածինի թթուիտ, 325,26 թոն ազոտի թթուիտ, եւ այլ թունաւոր նիւթեր:

Բնապահպանութեան եւ ընդերքի տեսչական մարմինին վիճակագրութեան  համաձայն, շրջակայ միջավայրին հասցուած 382,4 միլիոն դրամի վնաս եւ ներկայացուած է վնասի փոխհատուցման պահանջ:

LEAVE A REPLY

Please enter your comment!
Please enter your name here