Եթէ Հայերը Յարձակին, Ապա Մենք Տօնոյեանին Հետ Երեւանի Մէջ Կը Հանդիպինք. Հասանով

0
244

ՊԱՔՈՒ, «Ազ. Թի. Վի.».- Ատրպէյճանի պաշտպանութեան նախարար Զաքիր Հասանով, խօսելով 2016-ի Ապրիլեան պատերազմին մասին,  4 Ապրիլին յայտարարեց, որ ատրպէյճանական բանակը կրնայ որեւէ պահուն պատերազմելու վերսկսիլ, որովհետեւ «մեր բանակը ամբողջութեամբ համալրուած է զէնք-զինամթերքով եւ ունինք բարձրորակ զէնք՝ անօդաչու սարքեր, աւելի քան 1000 տեսակի զէնքեր»:

Ի պատասխան Հայաստանի պաշտպանութեան նախարար Դաւիթ Տօնոյեանի՝ «նոր պատերազմ՝ նոր տարածքներու համար» յայտարարութեան, Հասանով ըսած է. «Զինուորականները պէտք չէ խօսքերով կրակեն: Ես արդէն Տօնոյեանին զինուորական չեմ համարեր: Ան ծանօթ չէ իր ղեկավարած բանակի հնարաւորութիւններուն: Տօնոյեան այդ յայտարարութիւնը կատարած է Նիւ Եորքի մէջ՝ հայկական Սփիւռքի անդամներուն համար: Ան հոն գացած էր դրամ մուրալու համար: Եթէ հայերը անցնին յարձակման, ապա մենք Տօնոյեանին հետ կը հանդիպինք Երեւանի մէջ: Սակայն, անոնք յարձակելու հնարաւորութիւն չունին»:

Ատրպէյճանի արտաքին գործոց նախարար Էլմար Մամետիարով եւս   4 Ապրիլին անդրադարձած է Տօնոյեանի յայտարարութեան, պնդելով, որ նման յայտարարութիւններ նոր խոչընդոտներ կը դնեն բանակցութեան առջեւ։ Ան աւելցուց, թէ Հայաստանի արտաքին գործոց նախարարին հետ յաջորդ հանդիպման թուականը որոշուած է արդէն։

«Շատ շուտով երկկողմանի հանդիպում պիտի ունենանք եւ արդէն համաձայնած ենք թուականին շուրջ, սակայն աւանդոյթի համաձայն, այդ մասին յայտարարութիւնը միաժամանակ պիտի կատարուի Պաքուի եւ Երեւանի կողմէ», յայտնած է Մամետիարով:

LEAVE A REPLY

Please enter your comment!
Please enter your name here